నూతన జాతీయ ఉక్కు విధానం విజన్ 2047: 604 మిలియన్ టన్నుల ఉక్కు ఉత్పత్తి, ముడిసరుకు భద్రత, భారీగా ఎగుమతులే లక్ష్యం!
సూర్య వాణిజ్య & పారిశ్రామిక డెస్క్: 'వికసిత్ భారత్ @2047' లక్ష్యానికి అనుగుణంగా దేశీయ ఉక్కు రంగాన్ని ప్రపంచ స్థాయి పోటీకి సిద్ధం చేసేందుకు కేంద్ర ప్రభుత్వం ముసాయిదా "జాతీయ ఉక్కు విధానం (NSP) విజన్ 2047"ను విడుదల చేసింది. 2047 నాటికి దేశంలో క్రూడ్ స్టీల్ (ముడి ఉక్కు) వార్షిక ఉత్పత్తి సామర్థ్యాన్ని ఏకంగా 604 మిలియన్ టన్నులకు (దాదాపు 600 MT) పెంచాలని, తలసరి ఉక్కు వినియోగాన్ని 302 కేజీలకు మరియు ఎగుమతులను 45 మిలియన్ టన్నులకు చేర్చాలని ఈ విధానం ప్రతిపాదించింది.
ఉక్కు తయారీ వ్యయంలో 65 నుంచి 70 శాతం వరకు ముడిసరుకుకే వెచ్చించాల్సి వస్తుండటంతో, ముడిసరుకు భద్రతకు ఈ ముసాయిదా విధానంలో అగ్రప్రాధాన్యం ఇచ్చారు. ఐరన్ ఓర్ (ఇనుప ఖనిజం)లో భారత్ స్వయం సమృద్ధిని సాధించినప్పటికీ, కోకింగ్ కోల్ అవసరాల్లో దాదాపు 92 శాతం విదేశీ దిగుమతులపైనే ఆధారపడుతోంది. ఈ దిగుమతి భారాన్ని తగ్గించేందుకు దేశీయ మైనింగ్ విస్తరణ, కోల్ వాషరీల ఏర్పాటు, విదేశాల్లో మైనింగ్ ఆస్తుల కొనుగోలు, ఏఐ (ఆర్టిఫిషియల్ ఇంటెలిజెన్స్) సాంకేతికతతో కోకింగ్ కోల్ మిశ్రమాల ఆప్టిమైజేషన్ వంటి వ్యూహాలను ప్రభుత్వం ప్రతిపాదించింది.
దేశీయంగా 47 శాతం ముడి ఉక్కు ఉత్పత్తి సామర్థ్యాన్ని కలిగి ఉన్న సుమారు 2,550 సెకండరీ స్టీల్ యూనిట్లకు ముడిసరుకు సులభ లభ్యత, సాంకేతిక ఆధునికీకరణ, నైపుణ్యాభివృద్ధికి ప్రత్యేక ప్రోత్సాహకాలు అందించనున్నారు. కార్బన్ ఉద్గారాల తీవ్రతను టన్ను ఉక్కుకు 2.54 టన్నుల నుంచి 1.54 టన్నులకు తగ్గించి హరిత ఉక్కు (గ్రీన్ స్టీల్) తయారీని ప్రోత్సహించడమే కాకుండా, హై-ఎండ్ స్టీల్ వాటాను పెంచడమే లక్ష్యంగా నిర్దేశించుకున్నట్లు కేంద్ర ఉక్కు మంత్రిత్వ శాఖ వెల్లడించింది. దీనిపై వాటాదారుల సలహాలు, సూచనలను ఆహ్వానిస్తోంది.
