హోర్ముజ్ జలసంధిలో ట్యాంకర్ల పేలుడు: ఇరాన్ వార్నింగ్.. త్వరలోనే యుద్ధం ముగుస్తుందన్న ట్రంప్

సూర్య అంతర్జాతీయ బ్యూరో, టెహ్రాన్/వాషింగ్టన్: పశ్చిమాసియాలో ఉద్రిక్తతలు మరింత తీవ్రరూపం దాల్చాయి. వ్యూహాత్మక జలమార్గమైన హోర్ముజ్ జలసంధి గుండా అనధికార మార్గంలో వెళ్లేందుకు ప్రయత్నించిన రెండు భారీ చమురు ట్యాంకర్లు సముద్రపు మందుపాతరలు  ఢీకొని పేలిపోయాయని, అందులో ఒక సూపర్‌ట్యాంకర్‌లో భారీగా మంటలు చెలరేగాయని ఇరాన్ ఇస్లామిక్ రివల్యూషనరీ గార్డ్ కార్ప్స్  నేవీ వెల్లడించింది. ఆ రెండు నౌకలు తమ నావిగేషన్, గుర్తింపు వ్యవస్థలను ఆపివేసి అమెరికా సైన్యం అండతో రహస్యంగా వెళ్లేందుకు యత్నించాయని, పదేపదే హెచ్చరించినప్పటికీ నిబంధనలు ఉల్లంఘించడంతో ఈ ప్రమాదం జరిగిందని ఇరాన్ సైన్యం పేర్కొంది. బ్రిటన్ సముద్ర భద్రతా సంస్థ యూకేఎంటీవో  సైతం ఈ ప్రాంతంలో వాణిజ్య నౌకపై దాడి జరిగినట్లు ధ్రువీకరించింది.

మరోవైపు అమెరికా అధ్యక్షుడు డొనాల్డ్ ట్రంప్ ఈ యుద్ధ పరిస్థితులపై కీలక వ్యాఖ్యలు చేశారు. ఐయోవాలో జరిగిన ప్రచార ర్యాలీలో మాట్లాడుతూ.. ఇరాన్‌తో జరుగుతున్న యుద్ధం ‘చాలా త్వరలోనే’ ముగిసిపోతుందని స్పష్టం చేశారు. ఇరాన్ అణ్వాయుధాలను సమకూర్చుకోకుండా అడ్డుకోవడమే తమ సైనిక చర్యల ప్రధాన లక్ష్యమని ఆయన పునరుద్ఘాటించారు. యుద్ధం కారణంగా అంతర్జాతీయ మార్కెట్లో ముడి చమురు ధరలు పెరగడంపై స్పందిస్తూ.. అమెరికాతో పాటు ప్రపంచ దేశాల దీర్ఘకాలిక భద్రతతో పోలిస్తే చమురు ధరల పెరుగుదల చాలా స్వల్ప మూల్యమని (Small Price to Pay) పేర్కొన్నారు. యుద్ధం ముగియగానే క్రూడ్ ఆయిల్ ధరలు ఒక్కసారిగా భారీగా పడిపోతాయని ఆయన ధీమా వ్యక్తం చేశారు.

అయితే యుద్ధం ఎప్పుడు, ఎలా ముగుస్తుందనే దానిపై నిర్దిష్ట గడువును ట్రంప్ వెల్లడించలేదు. ఇజ్రాయెల్ ప్రధాని బెంజమిన్ నెతన్యాహుతోనూ ప్రస్తుత పరిస్థితులపై చర్చలు జరిపినట్లు ఆయన తెలిపారు. ప్రపంచ దేశాల ఇంధన రవాణాలో ఐదో వంతు వాటా కలిగిన హోర్ముజ్ జలసంధిలో ట్యాంకర్లపై దాడులు పునరావృతం కావడం, మరోవైపు నాయకత్వాల మధ్య మాటల యుద్ధం ముదరడంతో అంతర్జాతీయ మార్కెట్లో చమురు సరఫరాపై ఆందోళనలు కొనసాగుతూనే ఉన్నాయి.