అమెరికాలో వలసదారుల ఓట్ల వివాదం...ట్రంప్ యంత్రాంగానికి కోర్టులో చుక్కెదురు
సూర్య అంతర్జాతీయ డెస్క్: అమెరికాలో అధ్యక్షుడిగా డొనాల్డ్ ట్రంప్ అనుసరిస్తున్న విధానాలకు వ్యతిరేకంగా న్యాయస్థానం కీలక తీర్పు వెలువరించింది. అమెరికాలో ఓటర్ల జాబితాల ప్రక్షాళన పేరుతో రాష్ట్రాలపై ట్రంప్ యంత్రాంగం ఒత్తిడి తెవడాన్ని ఒక ఫెడరల్ జడ్జి స్పష్టంగా నిరోధించారు. వలసదారులు కానివారు ఓటు హక్కు వినియోగించుకోకుండా అడ్డుకోవాలనే ఉద్దేశంతో డిపార్ట్‌మెంట్ ఆఫ్ జస్టిస్ (డీఓజే) మరియు హోమ్‌ల్యాండ్ సెక్యూరిటీ శాఖలు చేపట్టిన చర్యలను సవాల్‌ చేస్తూ దాఖలైన వ్యాజ్యాలపై కోర్టు ఈ ఉత్తర్వులు జారీ చేసింది.
అమెరికాలో ఇటీవల జరుగుతున్న మధ్యకాలిక ఎన్నికల వేళ ఈ తీర్పు ప్రాధాన్యత సంతరించుకుంది. కాలిఫోర్నియాతో పాటు వివిధ రాష్ట్రాల్లోని ఓటర్ల జాబితాలను ఫెడరల్ డేటాబేస్‌లతో సరిపోల్చాలని, అనుమానిత వలసదారుల ఓట్లను పక్కన పెట్టాలని ట్రంప్ యంత్రాంగం తీవ్రంగా ఒత్తిడి తెచ్చింది. అయితే, ఫెడరల్ అధికారులు పంపిస్తున్న ఆ జాబితాలలో సాంకేతిక లోపాలు ఉన్నాయని, దీనివల్ల అర్హులైన వేలాది మంది నిజమైన పౌరులు తమ ఓటు హక్కును కోల్పోయే ప్రమాదం ఉందని న్యాయవాదులు కోర్టు దృష్టికి తీసుకువచ్చారు.
ఈ పరిణామాల నేపథ్యంలో స్పందించిన ఫెడరల్ న్యాయమూర్తి, రాష్ట్రాల ఎన్నికల అధికారులపై కేంద్ర ప్రభుత్వం బెదిరింపు ధోరణి అవలంబించడాన్ని తప్పుబట్టారు. ఇప్పటికే నమోదైన ఓట్లను వేరుచేయాలని లేదా ఎన్నికల నిబంధనలను మార్చాలని రాష్ట్రాలపై ఒత్తిడి తెచ్చే ఎలాంటి చర్యలకైనా పాల్పడవద్దని న్యాయస్థానం స్పష్టమైన ఆదేశాలు జారీ చేసింది. ఫెడరల్ ప్రభుత్వ ఆదేశాల కారణంగా స్థానిక ఎన్నికల అధికారులు గందరగోళానికి గురికావద్దని, ఇప్పటికే అమల్లో ఉన్న పద్ధతుల ప్రకారమే ఓట్ల ప్రక్రియ కొనసాగించాలని తేల్చిచెప్పింది.
అమెరికా చట్టాల ప్రకారం అక్రమ వలసదారులు ఓటు వేయడానికి అనర్హులని, దానిని అమలు చేయడం తమ బాధ్యత అని కేంద్ర ప్రభుత్వ న్యాయవాదులు వాదించినప్పటికీ, పౌరుల ఓటు హక్కును కాలరాసేలా అధికారులు ఏకపక్షంగా వ్యవహరించడాన్ని కోర్టు ఆక్షేపించింది. ఈ తీర్పు ద్వారా ఎన్నికల వేళ అమెరికాలోని వలసదారులకు మరియు పౌర హక్కుల సంఘాలకు పెద్ద ఉపశమనం లభించినట్లయింది. ఎన్నికల సమయంలో రాజ్యాంగబద్ధమైన హక్కుల పరిరక్షణే ధ్యేయంగా ఫెడరల్ కోర్టు తీసుకున్న ఈ నిర్ణయం దేశవ్యాప్తంగా తీవ్ర చర్చకు దారితీసింది.
