మలేషియా విమానాశ్రయంలో కోట్ల విలువైన ఏఐ చిప్స్ సీజ్

సూర్య అంతర్జాతీయ డెస్క్: గ్లోబల్ మార్కెట్‌లో టెక్నాలజీ రంగంలో అత్యంత కీలకమైన ఆర్టిఫిషియల్ ఇంటెలిజెన్స్ చిప్స్ అక్రమ రవాణా ఉదంతం తీవ్ర కలకలం రేపుతోంది. మలేషియాలోని ప్రధాన విమానాశ్రయమైన కౌలాలంపూర్ ఇంటర్నేషనల్ ఎయిర్‌పోర్టులో కస్టమ్స్ అధికారులు జరిపిన ఆకస్మిక తనిఖీల్లో భారీ ఎత్తున హై-పెర్ఫార్మెన్స్ ఏఐ చిప్స్ పట్టుబడ్డాయి. అంతర్జాతీయ మార్కెట్లో వీటి విలువ సుమారు 49.5 మిలియన్ల రింగిట్లు అంటే సుమారు 12.11 మిలియన్ అమెరికన్ డాలర్లు ఉంటుందని కస్టమ్స్ శాఖ అధికారికంగా ప్రకటించింది. అమెరికా విధిస్తున్న కఠినమైన సాంకేతిక ఆంక్షలు మరియు ట్రేడ్ నిబంధనలను తప్పించుకునేందుకు ఈ అక్రమ రవాణా జరిగినట్లు నిపుణులు భావిస్తున్నారు.

అధికారులు వెల్లడించిన వివరాల ప్రకారం, విమానాశ్రయ పరిధిలోని ఫ్రీ ట్రేడ్ జోన్ ప్రాంతంలో తనిఖీలు నిర్వహిస్తున్న సమయంలో ఈ అక్రమ షిప్‌మెంట్ వెలుగులోకి వచ్చింది. మొత్తం 30 సర్వర్ యూనిట్లలో అత్యంత విలువైన అధునాతన ఏఐ చిప్స్ ఉన్నట్లు గుర్తించారు. ఈ కంటైనర్లు ఆసియాలోని ఒక దేశం నుండి దిగుమతి అయి, మలేషియా మీదుగా మరొక ప్రాంతానికి రీ-ఎక్స్‌పోర్ట్ కావాల్సి ఉన్నట్లు తేలింది. అయితే ఈ స్థాయి సెమీకండక్టర్ల రవాణాకు అత్యవసరమైన ప్రత్యేక ట్రేడ్ పర్మిట్లు లేకుండానే అక్రమంగా తరలించేందుకు ప్రయత్నించినట్లు కస్టమ్స్ డైరెక్టర్ అస్పలిలా అగ్ తువా స్పష్టం చేశారు.

అధికారిక పత్రాల్లో ఎలాంటి అనుమానం రాకుండా ఉండేందుకు ఈ సర్వర్లను తప్పుదారి పట్టించే రీతిలో సాధారణ ఎలక్ట్రానిక్ కాంపోనెంట్స్‌గా తప్పుడు డిక్లరేషన్ ఇచ్చినట్లు అధికారులు గుర్తించారు. టెక్నాలజీ ఆంక్షల పరిధిలో ఉన్న అమెరికా తయారీ ఏఐ ప్రాసెసర్లు నిబంధనలను అతిక్రమించి అక్రమ మార్గాల్లో చేరడానికి ఈ రూట్‌ను ఎంచుకున్నట్లు స్పష్టమైంది. ఈ అక్రమ రవాణా వెనుక పెద్ద ఎత్తున అంతర్జాతీయ సిండికేట్ హస్తం ఉందని భావిస్తున్న కస్టమ్స్ శాఖ, ఇందుకు సహకరించిన స్థానిక మలేషియా కంపెనీని విచారణ నిమిత్తం అదుపులోకి తీసుకుంది.

గతంలో జూన్ నెలలోనూ ఇలాంటిదే మరో భారీ అక్రమ రవాణా యత్నాన్ని కస్టమ్స్ అధికారులు భగ్నం చేసిన నేపథ్యంలో, ఈ నెట్‌వర్క్‌పై మరింత నిఘా పెంచారు. ఇప్పటివరకు ఈ సిండికేట్‌కు సంబంధించి కనీసం ఐదు వేర్వేరు కేసులను గుర్తించామని, మొత్తం వంద మిలియన్ రింగిట్లకు పైగా విలువైన చిప్స్ సీజ్ చేసినట్లు అధికారులు తెలిపారు. ప్రస్తుతం ఈ కేసులో సమగ్ర దర్యాప్తు కొనసాగుతుండటంతో మరిన్ని వివరాలు రానున్న రోజుల్లో వెల్లడయ్యే అవకాశం ఉందని కస్టమ్స్ వర్గాలు పేర్కొంటున్నాయి.