డెలివరీ క్యూ2లో సరికొత్త రికార్డు.. ₹3,000 కోట్లు దాటిన ఆదాయం, మూడింతలైన ఎబిట్డా, లాభాల్లోకి లాజిస్టిక్స్ దిగ్గజం!
సూర్య బిజినెస్ బ్యూరో, ముంబై: ప్రముఖ లాజిస్టిక్స్ మరియు సప్లై చైన్ సేవల సంస్థ ‘డెలివరీ లిమిటెడ్’ ప్రస్తుత ఆర్థిక సంవత్సరం రెండో త్రైమాసికం (Q2)లో బలమైన ఆర్థిక పనితీరును కనబరిచింది. కంపెనీ చరిత్రలోనే తొలిసారిగా త్రైమాసిక కార్యకలాపాల ఆదాయం ₹3,000 కోట్ల మైలురాయిని అధిగమించింది. సెప్టెంబర్‌తో ముగిసిన త్రైమాసికంలో సంస్థ ఆదాయం వార్షిక ప్రాతిపదికన 19.4 శాతం వృద్ధితో ₹3,066.4 కోట్లకు చేరింది. గతేడాది ఇదే త్రైమాసికంలో నమోదైన ₹2,568 కోట్ల కంటే ఇది గణనీయమైన పెరుగుదల కావడం గమనార్హం.
కంపెనీ నిర్వహణ లాభదాయకత అసాధారణ వృద్ధిని నమోదు చేసింది. నివేదిత ఎబిట్డా గత ఏడాది ఇదే త్రైమాసికంలో నమోదైన ₹68 కోట్ల నుంచి ఏకంగా మూడు రెట్లు (దాదాపు 201%) పెరిగి ₹205 కోట్లకు చేరుకుంది. దీంతో ఎబిట్డా మార్జిన్ 2.7 శాతం నుంచి 6.7 శాతానికి విస్తరించింది. అంతేకాకుండా, గత ఆర్థిక సంవత్సరం రెండో త్రైమాసికంలో ₹51 కోట్ల నికర నష్టాన్ని చవిచూసిన డెలివరీ, ఈసారి అద్భుతమైన టర్న్‌అరౌండ్‌ను సాధించి ₹40.64 కోట్ల ఏకీకృత నికర లాభాన్ని (PAT) ఆర్జించింది.
ఈ రికార్డు వృద్ధికి ఎక్స్‌ప్రెస్ పార్శిల్ విభాగంలో భారీగా పెరిగిన వాల్యూమ్‌లు ప్రధాన చోదక శక్తిగా నిలిచాయి. పండుగ సీజన్ ఆరంభం మరియు ఈ-కామర్స్ ఆర్డర్ల జోరుతో ఎక్స్‌ప్రెస్ పార్శిల్ రవాణా పరిమాణం వార్షికంగా 32 శాతం వృద్ధితో 32.5 కోట్లకు (325 మిలియన్లు) చేరింది. అటు పార్ట్-ట్రక్‌లోడ్ (PTL) ఫ్రైట్ వాల్యూమ్ 14.2 శాతం పెరిగి 5.45 లక్షల మెట్రిక్ టన్నులుగా నమోదైంది. నెట్‌వర్క్ ఆటోమేషన్, ఖర్చుల నియంత్రణ మరియు కొత్తగా ప్రారంభించిన ‘డెలివరీ లోకల్’ (ఇన్-సిటీ రవాణా సేవలు) విభాగాల నుంచి బలమైన ఆదాయం తోడవడంతో కంపెనీ పటిష్ట లాభాల బాట పట్టింది.
