స్థానిక సంస్థల పోరులో సామాజిక సమీకరణాలే కూటమి వ్యూహం!

అన్ని వర్గాలకు రాజకీయ ప్రాతినిధ్యం కల్పించేలా అభ్యర్థుల ఎంపిక: ఎమ్మెల్యే ఆరిమిల్లి

తణుకు నియోజకవర్గంలో 56 ఎంపీటీసీ, మూడు జెడ్పీటీసీ స్థానాలకు అభ్యర్థుల ఖరారు

ఎంపీటీసీ బరిలో 30 మంది మహిళలు.. 26 మంది పురుషులు

టీడీపీకి 36, జనసేనకు 18, బీజేపీకి రెండు ఎంపీటీసీ స్థానాలు

జెడ్పీటీసీల్లో టీడీపీకి రెండు.. బీజేపీకి ఒక స్థానం

విభేదాలకు తావులేకుండా మూడు పార్టీల సమన్వయంతో నిర్ణయాలు

అన్ని స్థానాల్లో విజయమే లక్ష్యం.. 100 శాతం స్ట్రైక్‌రేట్ సాధిస్తాం: ఎమ్మెల్యే రాధాకృష్ణ

తణుకు,సూర్య న్యూస్ : స్థానిక సంస్థల ఎన్నికల్లో కేవలం సీట్ల సర్దుబాటుకే పరిమితం కాకుండా, సామాజిక సమతుల్యత, మహిళా సాధికారత, యువతకు రాజకీయ అవకాశాలు కల్పించడమే ప్రాతిపదికగా కూటమి అభ్యర్థుల ఎంపిక చేపట్టినట్లు తణుకు ఎమ్మెల్యే ఆరిమిల్లి రాధాకృష్ణ వెల్లడించారు. రాజకీయ ప్రాతినిధ్యం కొన్ని వర్గాలకే పరిమితం కాకుండా అన్ని సామాజిక వర్గాలకు అవకాశాలు కల్పించాలన్న లక్ష్యంతో అభ్యర్థులను ఖరారు చేసినట్లు స్పష్టం చేశారు. తణుకు నియోజకవర్గంలోని 56 ఎంపీటీసీ, మూడు జెడ్పీటీసీ స్థానాలకు తెలుగుదేశం, జనసేన, బీజేపీ పార్టీల మధ్య సమన్వయంతో అభ్యర్థుల ఎంపిక పూర్తయిందని, అన్ని స్థానాల్లో కూటమి అభ్యర్థులు నామినేషన్లు దాఖలు చేసినట్లు తెలిపారు.

శుక్రవారం స్థానిక కూటమి కార్యాలయంలో ఏర్పాటు చేసిన మీడియా సమావేశంలో ఎమ్మెల్యే ఆరిమిల్లి రాధాకృష్ణ స్థానిక సంస్థల ఎన్నికలకు సంబంధించిన సీట్ల సర్దుబాటు, అభ్యర్థుల సామాజిక సమీకరణాలు, ఎన్నికల వ్యూహాన్ని వివరించారు. అభ్యర్థుల ఎంపికలో మూడు పార్టీల నాయకుల మధ్య ఎలాంటి విభేదాలు, సమాచార లోపాలకు అవకాశం లేకుండా పరస్పర సంప్రదింపులతో నిర్ణయాలు తీసుకున్నట్లు పేర్కొన్నారు. రాష్ట్రస్థాయిలో పార్టీల నాయకత్వం, జిల్లా అధ్యక్షులు, సమన్వయ కమిటీలతో సంప్రదింపుల అనంతరం అభ్యర్థులను ఖరారు చేసినట్లు వివరించారు.

ఎంపీటీసీ స్థానాల పంపకంలో స్పష్టత.…

నియోజకవర్గంలోని మూడు మండలాల్లో మొత్తం 56 ఎంపీటీసీ స్థానాలకు సంబంధించి తెలుగుదేశం పార్టీ 36, జనసేన పార్టీ 18, భారతీయ జనతా పార్టీ రెండు స్థానాల్లో పోటీ చేస్తున్నట్లు ఎమ్మెల్యే తెలిపారు.

అత్తిలి మండలంలోని 20 ఎంపీటీసీ స్థానాల్లో టీడీపీకి 14, జనసేనకు ఐదు, బీజేపీకి ఒక స్థానాన్ని కేటాయించగా, తణుకు రూరల్ మండలంలోని 17 స్థానాల్లో టీడీపీకి 10, జనసేనకు ఆరు, బీజేపీకి ఒక స్థానం కేటాయించినట్లు వెల్లడించారు. ఇరగవరం మండలంలోని 19 ఎంపీటీసీ స్థానాల్లో టీడీపీ 12, జనసేన ఏడు స్థానాల్లో పోటీ చేస్తున్నట్లు తెలిపారు.

ఇరగవరం జెడ్పీటీసీ స్థానాన్ని బీజేపీకి కేటాయించిన నేపథ్యంలో ఆ మండలంలో ఎంపీటీసీ స్థానాన్ని ఆ పార్టీకి కేటాయించలేదని వివరించారు. మూడు పార్టీల రాజకీయ ప్రాతినిధ్యం, స్థానిక పరిస్థితులు, పరస్పర అంగీకారాన్ని పరిగణనలోకి తీసుకుని సీట్ల పంపకం పూర్తి చేసినట్లు పేర్కొన్నారు.

జెడ్పీటీసీ బరిలో ముగ్గురు అభ్యర్థులు.…

నియోజకవర్గంలోని మూడు జెడ్పీటీసీ స్థానాల్లో రెండు తెలుగుదేశం పార్టీకి, ఒకటి బీజేపీకి కేటాయించినట్లు ఎమ్మెల్యే రాధాకృష్ణ వెల్లడించారు.

అత్తిలి జెడ్పీటీసీ అభ్యర్థిగా తెలుగుదేశం పార్టీ నుంచి శిరగాని నాగేశ్వరరావు (నాగు), తణుకు రూరల్ జెడ్పీటీసీ అభ్యర్థిగా మట్టా వెంకటేశ్వరరావు (వెంకట్), ఇరగవరం జెడ్పీటీసీ అభ్యర్థిగా భారతీయ జనతా పార్టీ నుంచి పంపన మహాలక్ష్మి పోటీ చేస్తున్నట్లు తెలిపారు.

అదేవిధంగా ఎంపీపీ పదవుల్లో రెండు తెలుగుదేశం పార్టీకి, ఒకటి జనసేన పార్టీకి కేటాయించేందుకు అవగాహన కుదిరినట్లు వివరించారు. సీట్ల పంపకంలో మూడు పార్టీలకు సముచిత రాజకీయ ప్రాధాన్యం కల్పించే దిశగా నిర్ణయాలు తీసుకున్నట్లు పేర్కొన్నారు.

అభ్యర్థుల ఎంపికలో మహిళలదే పైచేయి..…

స్థానిక సంస్థల ఎన్నికల్లో మహిళలకు రాజకీయ ప్రాతినిధ్యం కల్పించడంలో కూటమి ప్రత్యేక శ్రద్ధ తీసుకున్నట్లు ఎమ్మెల్యే తెలిపారు. మొత్తం 56 ఎంపీటీసీ స్థానాల్లో 30 మంది మహిళలు, 26 మంది పురుషులు పోటీ చేస్తున్నారని వెల్లడించారు. సంఖ్యాపరంగా మహిళా అభ్యర్థులే అధికంగా ఉండటం ఈ ఎన్నికల్లో ప్రత్యేకతగా పేర్కొన్నారు.

రిజర్వేషన్లకు అనుగుణంగా అభ్యర్థులను ఎంపిక చేయడంతోపాటు రాజకీయ అనుభవం, ప్రజలతో సంబంధాలు, స్థానిక పరిస్థితులు, విద్యార్హతలకు ప్రాధాన్యం ఇచ్చినట్లు తెలిపారు. పదో తరగతి నుంచి డిగ్రీ, పీజీ, న్యాయవిద్య, బీఈడీ వంటి విద్యార్హతలు కలిగిన అభ్యర్థులు బరిలో ఉన్నారని వివరించారు.

యువతకు అవకాశాలు కల్పిస్తూనే అనుభవజ్ఞులైన సీనియర్ నాయకులకు కూడా ప్రాతినిధ్యం కల్పించినట్లు పేర్కొన్నారు.

రిజర్వేషన్లకు అతీతంగా సామాజిక వర్గాలకు అవకాశాలు..…

అభ్యర్థుల ఎంపికలో సామాజిక సమతుల్యతకు ప్రాధాన్యం ఇచ్చినట్లు ఎమ్మెల్యే రాధాకృష్ణ తెలిపారు. రిజర్వేషన్ ఉన్న స్థానాలతోపాటు రిజర్వేషన్ లేని కొన్ని స్థానాల్లో కూడా ఎస్సీ, బీసీ సామాజిక వర్గాలకు చెందిన అభ్యర్థులకు అవకాశం కల్పించినట్లు వెల్లడించారు.

ఎంపీటీసీ అభ్యర్థుల సామాజిక వివరాల ప్రకారం ఎస్సీ వర్గాలకు చెందిన తొమ్మిది మంది, బీసీ వర్గాలకు చెందిన 27 మంది, ఓసీ వర్గాలకు చెందిన 20 మంది పోటీ చేస్తున్నట్లు తెలిపారు.

ఎస్సీ వర్గంలో మాల సామాజిక వర్గానికి చెందిన ఆరుగురు, మాదిగ సామాజిక వర్గానికి చెందిన ముగ్గురు అభ్యర్థులకు అవకాశం కల్పించారు. ఓసీ వర్గంలో కాపు సామాజిక వర్గానికి చెందిన 17 మంది, కమ్మ సామాజిక వర్గానికి చెందిన ఇద్దరు, రెడ్డి సామాజిక వర్గానికి చెందిన ఒకరు పోటీ చేస్తున్నట్లు వివరించారు.

బీసీ ఉపకులాలకూ రాజకీయ ప్రాతినిధ్యం.…

వెనుకబడిన తరగతుల్లోని వివిధ ఉపకులాలకు సైతం రాజకీయ అవకాశాలు కల్పించడంపై ప్రత్యేక దృష్టి సారించినట్లు ఎమ్మెల్యే వెల్లడించారు.

బీసీ వర్గాల్లో శెట్టిబలిజ సామాజిక వర్గానికి చెందిన 11 మంది, గౌడ సామాజిక వర్గానికి చెందిన ముగ్గురు, తూర్పు కాపు సామాజిక వర్గానికి చెందిన ఇద్దరు, కొప్పువెలమ సామాజిక వర్గానికి చెందిన ఇద్దరు అభ్యర్థులు పోటీ చేస్తున్నట్లు తెలిపారు.అలాగే గవర, పద్మశాలి, అగ్నికుల క్షత్రియ, నాయి బ్రాహ్మణ, బురగ బలిజ సామాజిక వర్గాల నుంచి ఒక్కొక్కరికి అవకాశం కల్పించగా, ఇతర బీసీ వర్గాలకు చెందిన మరో నలుగురు అభ్యర్థులు పోటీలో ఉన్నట్లు వివరించారు.సాధారణంగా రాజకీయ అవకాశాలు పరిమితంగా లభించే కొన్ని ఉపకులాలకు కూడా ఈసారి ప్రాతినిధ్యం కల్పించే ప్రయత్నం చేశామని పేర్కొన్నారు. సామాజిక వర్గాల మధ్య సమతుల్యత పాటిస్తూ గ్రామస్థాయి పాలనలో అన్ని వర్గాల భాగస్వామ్యాన్ని పెంపొందించడమే తమ ఉద్దేశమని స్పష్టం చేశారు.అభివృద్ధి, సంక్షేమమే ఎన్నికల అజెండా..…ప్రధానమంత్రి నరేంద్ర మోదీ సహకారంతో ముఖ్యమంత్రి నారా చంద్రబాబు నాయుడు, ఉపముఖ్యమంత్రి పవన్ కళ్యాణ్, మంత్రి నారా లోకేష్ నాయకత్వంలో రాష్ట్రంలో అమలవుతున్న అభివృద్ధి, సంక్షేమ కార్యక్రమాలను ప్రజల్లోకి తీసుకెళ్లనున్నట్లు ఎమ్మెల్యే తెలిపారు.తెలుగుదేశం, జనసేన, బీజేపీ రాష్ట్ర నాయకత్వాల మార్గదర్శకత్వంలో స్థానిక సంస్థల ఎన్నికలను సమన్వయంతో ఎదుర్కొంటున్నట్లు వివరించారు. కూటమి ప్రభుత్వం చేపట్టిన అభివృద్ధి కార్యక్రమాలు, ప్రజలకు అందుతున్న సంక్షేమ పథకాలను ప్రజలకు వివరిస్తూ ఎన్నికల ప్రచారం నిర్వహించనున్నట్లు పేర్కొన్నారు.వైఎస్సార్ కాంగ్రెస్ పార్టీ చేస్తున్న విమర్శలకు తమ అభ్యర్థుల ఎంపికే సమాధానమని వ్యాఖ్యానించారు. అన్ని సామాజిక వర్గాలకు రాజకీయ అవకాశాలు కల్పించడం ద్వారా కూటమి తన విధానాన్ని ఆచరణలో చూపించిందని పేర్కొన్నారు.గ్రామాభివృద్ధికి ప్రభుత్వంతో సమన్వయం అవసరం.గ్రామాల అభివృద్ధి, మౌలిక సదుపాయాల విస్తరణ, సంక్షేమ పథకాల అమలులో స్థానిక ప్రజాప్రతినిధుల పాత్ర కీలకమని ఎమ్మెల్యే రాధాకృష్ణ అభిప్రాయపడ్డారు. స్థానిక సంస్థల్లో ఎన్నికయ్యే ప్రజాప్రతినిధులు రాష్ట్ర ప్రభుత్వంతో సమన్వయంగా పనిచేస్తే గ్రామాల అభివృద్ధికి మరిన్ని అవకాశాలు ఏర్పడతాయని పేర్కొన్నారు.ప్రజలకు అందుబాటులో ఉండే నాయకత్వం, గ్రామాల సమస్యల పరిష్కారం, అభివృద్ధి కార్యక్రమాల సమర్థ అమలుకు ప్రాధాన్యం ఇస్తామని తెలిపారు. ప్రజల అవసరాలను గుర్తించి వాటికి అనుగుణంగా పనిచేసే స్థానిక పాలనను అందించడమే కూటమి లక్ష్యమని వివరించారు.అన్ని స్థానాల్లో విజయమే కూటమి లక్ష్యం.తణుకు నియోజకవర్గంలోని 56 ఎంపీటీసీ, మూడు జెడ్పీటీసీ స్థానాల్లో కూటమి అభ్యర్థులందరినీ గెలిపించి 100 శాతం స్ట్రైక్‌రేట్ సాధించడమే తమ లక్ష్యమని ఎమ్మెల్యే ఆరిమిల్లి రాధాకృష్ణ స్పష్టం చేశారు.మూడు పార్టీల నాయకులు, కార్యకర్తలు వ్యక్తిగత అభిప్రాయాలకు అతీతంగా సమష్టిగా పనిచేయాలని, సీట్ల సర్దుబాటు పూర్తయిన నేపథ్యంలో అభ్యర్థుల విజయంపైనే దృష్టి సారించాలని పిలుపునిచ్చారు. కూటమి పార్టీల మధ్య విభేదాలకు, అపోహలకు తావులేకుండా ఉమ్మడి ప్రచారంతో ప్రజల్లోకి వెళ్లనున్నట్లు వెల్లడించారు.సీట్ల పంపకంలో పరస్పర అవగాహన, అభ్యర్థుల ఎంపికలో సామాజిక సమతుల్యత, ఎన్నికల నిర్వహణలో మూడు పార్టీల ఐక్యత తమ విజయానికి పునాదులుగా నిలుస్తాయని విశ్వాసం వ్యక్తం చేశారు.తణుకు నియోజకవర్గ ప్రజలు అభివృద్ధి, సంక్షేమ కార్యక్రమాలను పరిగణనలోకి తీసుకుని స్థానిక సంస్థల ఎన్నికల్లో కూటమి అభ్యర్థులను ఆశీర్వదించాలని కోరారు. అన్ని వర్గాల భాగస్వామ్యంతో గ్రామాల అభివృద్ధిని ముందుకు తీసుకెళ్లేందుకు కట్టుబడి ఉన్నామని ఎమ్మెల్యే రాధాకృష్ణ స్పష్టం చేశారు.ఈ మీడియా సమావేశంలో కూటమి అభ్యర్థులు, మూడు పార్టీల నాయకులు  తదితరులు పాల్గొన్నారు.

రిపోర్టర్. .అనుకుమార్. తణుకు. …పశ్చిమగోదావరి జిల్లా.