స్థానిక సమరానికి కూటమి కసరత్తు,సార్వత్రిక ఎన్నికల స్ఫూర్తితో విజయం సాధిద్దాం

అనంతపురం అర్బన్‌లో కూటమి పార్టీల సర్వసభ్య సమావేశం.. ఆశావహుల నుంచి దరఖాస్తుల స్వీకరణ

అనంతపురం: రానున్న స్థానిక సంస్థల ఎన్నికలకు అనంతపురం అర్బన్ నియోజకవర్గ కూటమి పార్టీలు సమాయత్తమవుతున్నాయి. నగర శివారులోని ఆర్కే ఫంక్షన్ హాల్లో ఎమ్మెల్యే దగ్గుపాటి ప్రసాద్ ఆధ్వర్యంలో టీడీపీ, జనసేన, బీజేపీ నాయకుల సర్వసభ్య సమావేశం నిర్వహించారు. సమావేశంలో ఎన్నికల వ్యూహాలపై చర్చించడంతో పాటు ఆశావహుల నుంచి దరఖాస్తులు స్వీకరించారు.

ఎమ్మెల్యే దగ్గుపాటి ప్రసాద్ మాట్లాడుతూ.. సార్వత్రిక ఎన్నికల్లో కూటమి పార్టీల ఐక్యతతో సాధించిన విజయ స్ఫూర్తితో స్థానిక ఎన్నికల్లోనూ సమన్వయంతో పనిచేయాలని పిలుపునిచ్చారు. టికెట్లు ఎవరికి దక్కినా అందరూ కలిసి పనిచేసి మొత్తం 62 డివిజన్లలో విజయం సాధించేలా కృషి చేయాలని కోరారు. పార్టీ వ్యతిరేక కార్యకలాపాలకు దూరంగా ఉండాలని సూచించారు. కాగా, అనంతపురం నగర పాలక సంస్థలో ప్రస్తుతం 62 డివిజన్లుగా తుది విభజన జరిగినట్లు అధికారిక గెజిట్‌లో పేర్కొన్నారు.

టీడీపీ జిల్లా అధ్యక్షుడు పూల నాగరాజు సమన్వయంతో ముందుకు సాగాలని సూచించగా, కూటమి నాయకులు అభివృద్ధి, సంక్షేమ కార్యక్రమాలను ప్రజల్లోకి తీసుకెళ్లాలని పిలుపునిచ్చారు. పార్టీ జోనల్ కోఆర్డినేటర్ శ్రీనివాస్‌రెడ్డి మాట్లాడుతూ పొత్తు ధర్మాన్ని పాటిస్తూ, అధిష్టానం నిర్ణయించిన అభ్యర్థులకు అందరూ సహకరించాలని కోరారు.

ఎన్నికల పరిశీలకుడు, మాజీ మంత్రి ఏరాసు ప్రతాప్‌రెడ్డి, బీజేపీ నాయకులు సందిరెడ్డి శ్రీనివాస్, కొనకొండ్ల రాజేష్ తదితరులు సమావేశంలో మాట్లాడారు. ఎమ్మెల్సీ దళవాయి రమాదేవి, టీడీపీ పరిశీలకుడు దేవేంద్రప్పతో పాటు మూడు పార్టీల నాయకులు, కార్యకర్తలు పాల్గొన్నారు.

గమనిక: స్థానిక సంస్థల ఎన్నికలకు సంబంధించిన ఎన్నికల ప్రక్రియ ప్రస్తుతం కొనసాగుతున్నప్పటికీ, పోలింగ్ తేదీ ఇంకా ప్రకటించబడలేదు.