*స్థానిక ఎన్నికల్లో విజయమే లక్ష్యం....

విజయనగరం బ్యూరో,  సూర్య : రాబోయే స్థానిక సంస్థల ఎన్నికల్లో నెల్లిమర్ల నగర పంచాయతీని కైవసం చేసుకోవడమే లక్ష్యంగా కూటమి నాయకులు సమాయత్తమవుతున్నారు. ఇందులో భాగంగా విజయనగరంలో నెల్లిమర్ల నగర పంచాయతీ పరిధిలోని టీడీపీ, జనసేన, బీజేపీ నాయకులతో ప్రత్యేక సన్నాహక సమావేశం నిర్వహించారు. జిల్లా టీడీపీ అధ్యక్షుడు, కిమిడి నాగార్జున, ఎమ్మెల్యే లోకం నాగ మాధవి, ఏపీ మార్క్‌ఫెడ్ చైర్మన్, నెల్లిమర్ల టీడీపీ ఇన్‌చార్జి కర్రోతు బంగార్రాజు అధ్యక్షతన జరిగిన ఈ సమావేశంలో నగర పంచాయతీ చైర్మన్, కౌన్సిలర్ స్థానాల్లో కూటమి అభ్యర్థుల విజయానికి అనుసరించాల్సిన వ్యూహాలపై చర్చించారు.

గెలుపే ప్రామాణికంగా అభ్యర్థుల ఎంపిక

నెల్లిమర్ల నగర పంచాయతీపై కూటమి జెండా ఎగురవేయాలంటే నాయకులు, కార్యకర్తలు సమన్వయంతో పనిచేయాలని నేతలు పిలుపునిచ్చారు. ప్రతి వార్డులో పార్టీ శ్రేణులు ప్రజలకు అందుబాటులో ఉంటూ, కూటమి విజయానికి కృషి చేయాలని సూచించారు.

ఐక్యంగా పనిచేయాలని పిలుపు

కూటమి పార్టీల మధ్య సమన్వయం, నాయకుల మధ్య పరస్పర సహకారం ఎన్నికల్లో కీలకమని నేతలు అభిప్రాయపడ్డారు. చైర్మన్ స్థానంతో పాటు కౌన్సిలర్ స్థానాల్లోనూ మెరుగైన ఫలితాలు సాధించేలా ఇప్పటి నుంచే ప్రణాళికాబద్ధంగా ముందుకు సాగాలని సూచించారు.

ఈ సమావేశంలో టీడీపీ సీనియర్ నాయకుడు సువ్వాడ రవిశేఖర్, మండల పార్టీ అధ్యక్షుడు కడగల ఆనందకుమార్, ఏఎంసీ ప్రతినిధి గేదెల రాజారావు, జనసేన నాయకులు లోకం ప్రసాద్, రవ్వ నాని తదితరులతో పాటు నెల్లిమర్ల నగర పంచాయతీ పరిధిలోని కూటమి నాయకులు, టీడీపీ, జనసేన, బీజేపీ ముఖ్య నాయకులు, కౌన్సిలర్ అభ్యర్థులు, వార్డు ఇన్‌చార్జులు పాల్గొన్నారు.

రిపోర్టర్ :  డేవిడ్ రాజు, విజయనగరం.