రాజీవ్ నగర్ కాలనీవాసుల ఇళ్ల కూల్చివేతను నిలిపివేయాలి

రాజీవ్ నగర్ కాలనీ వాసుల ఇళ్ల కూల్చివేతను నిలిపివేయాలి

నష్టపరిహారం, ప్రత్యామ్నాయ ఇళ్ల స్థలాలు కల్పించే వరకు కూల్చివేతలు వద్దు: వైఎస్ మనోహర్ రెడ్డి

పులివెందుల మేజర్ న్యూస్ :

ముద్దనూరు–కొడికొండ జాతీయ రహదారి నిర్మాణంలో భాగంగా పులివెందులలోని రాజీవ్ నగర్ కాలనీ వాసులు తమ నివాసాలను కోల్పోయే పరిస్థితి ఏర్పడిందని వైఎస్ మనోహర్ రెడ్డి తెలిపారు. బాధిత కుటుంబాలకు తగిన నష్టపరిహారం అందించడంతో పాటు ప్రత్యామ్నాయ ఇళ్ల స్థలాలు కేటాయించిన తర్వాతే రోడ్డు విస్తరణ పనులు చేపట్టాలని ప్రభుత్వాన్ని కోరారు.
గత కొంతకాలంగా రాజీవ్ నగర్ కాలనీ వాసులకు న్యాయం చేయాలని, వారికి రావాల్సిన నష్టపరిహారం అందించి, ప్రత్యామ్నాయ నివాస సౌకర్యం కల్పించాలని వైఎస్సార్‌సీపీ ఆధ్వర్యంలో ప్రభుత్వాన్ని కోరుతున్నామని ఆయన తెలిపారు.
అయితే సోమవారం రోడ్డు విస్తరణ అధికారులు మరోసారి ఇళ్లను తొలగించి రోడ్డు నిర్మాణ పనులు చేపట్టేందుకు ప్రయత్నించడంతో కాలనీ వాసులు ఈ విషయాన్ని వైఎస్ మనోహర్ రెడ్డి దృష్టికి తీసుకెళ్లారు.
దీంతో వైఎస్ మనోహర్ రెడ్డి, వైఎస్సార్‌సీపీ పట్టణ అధ్యక్షులు హాల్ గంగాధర్ రెడ్డి, పట్టణ ఉపాధ్యక్షులు పార్నపల్లి కిషోర్, సీనియర్ నాయకులు కోడి రమణ తదితరులతో కలిసి ఆర్డీఓను కలిసి పరిస్థితిని వివరించారు.
బాధిత కుటుంబాలకు నష్టపరిహారం, ప్రత్యామ్నాయ ఇళ్ల స్థలాలు కేటాయించే వరకు ఎలాంటి కూల్చివేతలు చేపట్టకుండా చూడాలని ఆర్డీఓను కోరారు. బాధితుల జీవనోపాధి, నివాస భద్రతను దృష్టిలో ఉంచుకుని మానవతా దృక్పథంతో వ్యవహరించాలని విజ్ఞప్తి చేశారు.
దీనిపై స్పందించిన ఆర్డీఓ వెంటనే సంబంధిత అధికారులతో మాట్లాడి, బాధితులకు నష్టపరిహారం, ప్రత్యామ్నాయ నివాస ఏర్పాట్లకు సంబంధించిన ప్రక్రియ పూర్తయ్యే వరకు ఎలాంటి కూల్చివేతలు ఉండబోవని హామీ ఇచ్చారు.
ఈ కార్యక్రమంలో వైఎస్సార్‌సీపీ నాయకులు, మాజీ కౌన్సిలర్ నాగరాజు, కుళ్లాయప్ప తదితరులు పాల్గొన్నారు.