ప్రమాదశాత్తు పూరిల్లు ధగ్నం

చిల్లకూరు మేజర్ న్యూస్ :   చిల్లకూరు మండలం ఈదులవారిపాళెం గ్రామంలో మంగళవారం విషాదకర ఘటన చోటుచేసుకుంది. కోనేరు సుబ్రమణ్యం, పద్మమ్మ దంపతులకు చెందిన పూరిల్లు ప్రమాదవశాత్తు మంటల్లో పూర్తిగా దగ్ధమైంది. ఈ అగ్నిప్రమాదంలో ఇంట్లోని వస్తువులతో పాటు ఇద్దరు కుమార్తెల భవిష్యత్తు కోసం దాచుకున్న బంగారం, నగదు సైతం కాలిపోయినట్లు బాధితులు వాపోయారు. కుటుంబానికి చెందిన పూరిల్లు ఒక్కసారిగా మంటలకు ఆహుతి కావడంతో వారు తీవ్ర ఆవేదనకు గురయ్యారు. తమ ఇద్దరు కుమార్తెల అవసరాల కోసం ఎంతో కష్టపడి కూడబెట్టుకున్న బంగారం, నగదు అగ్నికి ఆహుతి కావడంతో సుబ్రమణ్యం, పద్మమ్మ దంపతులు కన్నీరుమున్నీరుగా విలపిస్తున్నారు. కష్టపడి సంపాదించుకున్న ఆస్తి కళ్లముందే బూడిద కావడంతో బాధిత కుటుంబం దిక్కుతోచని స్థితిలో పడిపోయింది. ఈ ఘటనతో గ్రామంలో విషాద ఛాయలు అలుముకున్నాయి. బాధిత కుటుంబాన్ని ఆదుకోవాలని, ప్రభుత్వం మరియు దాతలు ముందుకు వచ్చి సహాయం అందించాలని స్థానికులు కోరుతున్నారు.