బోయకొండ గంగమ్మ ఆలయ టెండర్‌పై సమగ్ర విచారణకు వినతి
బోయకొండ గంగమ్మ ఆలయ టెండర్‌పై సమగ్ర విచారణకు వినతి
విచారణ పూర్తయ్యే వరకు ఈవోపై చర్యలు తీసుకోవాలని వినతి.. టెండర్‌దారుడిపై దాడి ఘటనపైనా విచారణ కోరిన వెంకట్ యాదవ్
మదనపల్లె: బోయకొండ గంగమ్మ దేవస్థానంలో టెండర్ ప్రక్రియకు సంబంధించి కొన్ని అనుమానాలు, ఆరోపణలు ఉన్నాయని, వాటిపై సమగ్రంగా విచారణ జరిపించాలని కోరుతూ జిల్లా కలెక్టర్‌కు వినతిపత్రం సమర్పించినట్లు చౌడపల్లికి చెందిన ఓ. వెంకట్ యాదవ్ తెలిపారు.
సోమవారం మదనపల్లెలో మీడియాతో ఆయన మాట్లాడుతూ.. దేవస్థానం ఈవో ఏకాంబరంపై వచ్చిన ఆరోపణలను అధికారులు పరిశీలించి, విచారణ పూర్తయ్యే వరకు తగిన చర్యలు తీసుకోవాలని కోరినట్లు తెలిపారు. అలాగే టెండర్‌దారుడిపై జరిగినట్లు చెబుతున్న దాడి ఘటనపై కూడా ప్రత్యేక కమిటీ ఏర్పాటు చేసి వాస్తవాలను వెలుగులోకి తీసుకురావాలని విజ్ఞప్తి చేసినట్లు చెప్పారు.
టెండర్ ప్రక్రియకు ముందే సుమారు 70 శాతం పనులు పూర్తయ్యాయనే ఆరోపణలు ఉన్నాయని, ఈ అంశంపై సంబంధిత వర్క్ ఆర్డర్లు, బిల్లులు, పనుల పురోగతి వివరాలను అధికారులు పరిశీలించాలని కోరినట్లు తెలిపారు. ఆరోపణల్లో వాస్తవం ఎంతవరకు ఉందో అధికారిక విచారణ ద్వారా నిర్ధారించాలని పేర్కొన్నారు.
అదేవిధంగా దేవస్థానంలో వసూలు చేస్తున్న టోల్ రుసుములకు సంబంధించిన లెక్కలు, ఆదాయ-వ్యయ వివరాలను కూడా పరిశీలించాలని కోరారు. ఆలయ టెండర్ ప్రక్రియలో ఎలాంటి రాజకీయ లేదా ఇతర అనవసర జోక్యానికి అవకాశం లేకుండా పారదర్శకంగా వ్యవహరించేలా చర్యలు తీసుకోవాలని జిల్లా కలెక్టర్‌ను కోరినట్లు వెంకట్ యాదవ్ తెలిపారు.
తమ ఫిర్యాదులో పేర్కొన్న అంశాలపై నిష్పక్షపాతంగా విచారణ జరిపి, వాస్తవాలను నిర్ధారించి తగిన చర్యలు తీసుకోవాలని ఆయన కోరారు.
