'బకెట్', 'పెన్ స్టాండ్' సింబల్స్‌పై నిషేధం

అమరావతి:రాష్ట్రంలో స్థానిక సంస్థల ఎన్నికల నిర్వహణ, గుర్తుల కేటాయింపునకు సంబంధించి ఆంధ్రప్రదేశ్ రాష్ట్ర ఎన్నికల కమిషన్ (AP SEC) కీలక నిర్ణయం తీసుకుంది. ఉచిత గుర్తుల (Free Symbols) జాబితా నుంచి 'బకెట్', 'పెన్ స్టాండ్' గుర్తులను కేటాయించకూడదని భావిస్తూ వాటిపై నిషేధం విధిస్తూ ఉత్తర్వులు జారీ చేసింది.

కూటమి భాగస్వామ్య పక్షమైన జనసేన పార్టీకి కేటాయించిన అధికారిక గుర్తు 'గాజు గ్లాస్' (Glass) ను ఈ 'బకెట్', 'పెన్ స్టాండ్' గుర్తులు దగ్గరగా పోలి ఉండటమే ఇందుకు ప్రధాన కారణం. ఓటింగ్ సమయంలో ఓటర్లు గందరగోళానికి గురయ్యే అవకాశం ఉందని, జనసేన అభ్యర్థుల ఓట్లకు గండిపడే ప్రమాదం ఉందని గుర్తించిన ఎస్‌ఈసీ ఈ ముందస్తు నిర్ణయం తీసుకుంది. దీంతో రాబోయే ఎన్నికల్లో స్వతంత్రులు లేదా ఇతర పార్టీల అభ్యర్థులకు బకెట్, పెన్ స్టాండ్ గుర్తులను కేటాయించరు.