ప్రైవేట్ పాఠశాలల్లో 25 శాతం ఉచిత ప్రవేశాలపై ప్రత్యేక కమిటీ

పేద విద్యార్థులకు నాణ్యమైన విద్యను చేరువ చేసే లక్ష్యంతో ఆంధ్రప్రదేశ్ ప్రభుత్వం మరో కీలక నిర్ణయం తీసుకుంది. విద్యా హక్కు చట్టం (RTE Act) నిబంధనల ప్రకారం ప్రైవేట్ అన్-ఎయిడెడ్ పాఠశాలల్లో బలహీన వర్గాల పిల్లలకు కేటాయించాల్సిన 25 శాతం ఉచిత ప్రవేశాల అమలు తీరును మెరుగుపరిచేందుకు కసరత్తు ప్రారంభించింది. ఇందులో భాగంగా ప్రస్తుత మార్గదర్శకాలను పూర్తిగా సవరించి, పారదర్శక విధానాన్ని తీసుకొచ్చేందుకు 16 మంది సభ్యులతో ఒక ఉన్నత స్థాయి రాష్ట్రస్థాయి కమిటీని ఏర్పాటు చేస్తూ అధికారిక ఉత్తర్వులు జారీ చేసింది.  పాఠశాల విద్యాశాఖ డైరెక్టర్ తమీమ్ అన్సారియా ఛైర్మన్‌గా వ్యవహరించనున్న ఈ కమిటీలో సమగ్ర శిక్షా ఎస్పీడీ కన్వీనర్‌గా కొనసాగనున్నారు. అలాగే విద్యాశాఖకు చెందిన వివిధ విభాగాల డైరెక్టర్లు, లీగల్ అడ్వైజర్లు, ఎన్జీవో ప్రతినిధులు, ప్రైవేట్ పాఠశాలల సంఘాల ప్రతినిధులతో పాటు ఈ చట్టం కింద ప్రవేశాలు పొందిన విద్యార్థుల తల్లిదండ్రులకు కూడా ఈ కమిటీలో చోటు కల్పించారు. సుప్రీంకోర్టు తీర్పులు మరియు జాతీయ బాలల హక్కుల పరిరక్షణ కమిషన్ (NCPCR) మార్గదర్శకాలకు అనుగుణంగా ఆన్‌లైన్ అడ్మిషన్ల ప్రక్రియ, ఫీజు రీయింబర్స్‌మెంట్ వంటి అంశాలపై ఈ కమిటీ సమగ్ర అధ్యయనం చేసి ప్రభుత్వానికి త్వరలోనే నివేదిక అందించనుంది.