అనకాపల్లి జిల్లా పరిషత్ డిప్యూటీ సీఈఓగా ఈ. సందీప్ బాధ్యతల స్వీకరణ

  అనకాపల్లి ప్రతినిధి, అక్టోబర్ 1, మేజర్ న్యూస్: 
అనకాపల్లి జిల్లా ప్రజా పరిషత్ (జెడ్పిపి) డిప్యూటీ ముఖ్య కార్యనిర్వహణాధికారిగా
ఈ. సందీప్ గురువారం  బాధ్యతలు స్వీకరించారు. ఈ సందర్భంగా కార్యాలయ సిబ్బంది ఆయనకు పుష్పగుచ్ఛాలు అందజేసి ఘనంగా స్వాగతం పలికారు. ఈ విషయాన్ని జిల్లా పరిషత్ ముఖ్య కార్యనిర్వహణాధికారి పి. నారాయణమూర్తి ఒక ప్రకటనలో తెలిపారు.
బాధ్యతలు స్వీకరించిన అనంతరం డిప్యూటీ సీఈఓ ఈ. సందీప్ కార్యాలయ సిబ్బందిని ఉద్దేశించి మాట్లాడుతూ, జిల్లా అభివృద్ధి లక్ష్యాల సాధనలో ప్రతి ఉద్యోగి సమన్వయంతో, బాధ్యతాయుతంగా, సమయపాలనతో విధులు నిర్వహించాలని సూచించారు. ప్రభుత్వ సంక్షేమ, అభివృద్ధి పథకాలు క్షేత్రస్థాయిలో ప్రజలకు సక్రమంగా చేరేలా పారదర్శకంగా, సమర్థవంతంగా పనిచేయాలని కోరారు. సిబ్బంది సంక్షేమానికి తనవంతు సహకారం ఎల్లప్పుడూ అందిస్తానని హామీ ఇచ్చారు.
అనంతరం పరిపాలనాధికారులు పి.వి.వి.ఎన్. మూర్తి, రాజేశ్వరి , అమ్మాజి తదితరులు నూతన డిప్యూటీ సీఈఓ సందీప్‌కు శుభాకాంక్షలు తెలిపారు.