స్థానిక కళాకారులను విస్మరించి ఉత్సవాలను జరపడం సరికాదు

సూర్య, ఇల్లందు,ఇల్లందు దసరా ఉత్సవాల్లో స్థానిక కళాకారులకు మొండిచేయి న్యాయమా...??ఏళ్లుగా వస్తున్న సంప్రదాయానికి విరామమెందుకు....?నృత్య కళాకారుల తరఫున దండు సారయ్య ఆవేదన
ప్రతి ఏటా నిర్వహించిన విధంగానే ఈ సంవత్సరం కూడా
ఇల్లందు పట్టణంలో  దసరా ఉత్సవాలను మున్సిపల్ శాఖ ఆధ్వర్యంలో నిర్వహిస్తున్నారు. అయితే  స్థానిక నృత్య కళాకారులు ప్రదర్శనలు ఇవ్వడం కూడా సంప్రదాయంగా వస్తున్నప్పటికీ, ఈసారి వారికి అవకాశం కల్పించకపోవడంపై 13వ వార్డు కౌన్సిలర్ దండు సారయ్య తీవ్ర ఆవేదన వ్యక్తం చేశారు. ఎన్నో సంవత్సరాలుగా నృత్య కళను నమ్ముకొని సాధన చేస్తూ, తమ ప్రతిభతో ప్రజలను అలరిస్తున్న స్థానిక కళాకారులకు దసరా ఉత్సవాల్లో అవకాశం కల్పించకపోవడం విచారకరమన్నారు. ఏళ్లుగా కొనసాగుతున్న సంప్రదాయాన్ని ఈసారి ఎందుకు పక్కనపెట్టారో సంబంధిత అధికారులు, ఉత్సవ నిర్వాహకులు సమాధానం చెప్పాలని ప్రశ్నించారు.

*స్థానిక కళాకారులంటే ఎందుకింత నిర్లక్ష్యం?*
దసరా వంటి ప్రధాన పండుగల్లో స్థానిక కళాకారులను ప్రోత్సహించాల్సిన బాధ్యత నిర్వాహకులపై ఉందని దండు సారయ్య పేర్కొన్నారు. కళాకారులు తమ ప్రతిభను ప్రదర్శించేందుకు అవకాశం కోరుతున్నారని, వారికి వేదిక కల్పించడం ఎవరో చేసే ఉపకారం కాదని స్పష్టం చేశారు. స్థానికంగా ప్రతిభావంతులైన కళాకారులు ఉన్నప్పటికీ వారికి అవకాశం కల్పించకపోవడం వారి కళా నైపుణ్యాన్ని గుర్తించనట్లేనని అన్నారు. పండుగ వేడుకల్లో స్థానిక కళాకారులకు ప్రాధాన్యత ఇవ్వకపోతే వారిని ప్రోత్సహించేదెవరు? వారి ప్రతిభకు గుర్తింపు లభించేదెలా? అని ప్రశ్నించారు.

*అధికారులు స్పందించి న్యాయం చేయాలి*
ఇల్లందు ఎమ్మెల్యే కోరం కనకయ్య, మున్సిపల్ చైర్‌పర్సన్ దొడ్డ కిరణ్ మిత్ర, మున్సిపల్ కమిషనర్ సందీప్ ఈ విషయంపై తక్షణమే స్పందించాలని దండు సారయ్య కోరారు. దసరా ఉత్సవాల్లో స్థానిక నృత్య కళాకారులకు ప్రదర్శనలు ఇచ్చే అవకాశం కల్పించేలా సంబంధిత అధికారులు, నిర్వాహకులు చర్యలు తీసుకోవాలని విజ్ఞప్తి చేశారు. ఏళ్లుగా కొనసాగుతున్న సంప్రదాయాన్ని యథావిధిగా కొనసాగిస్తూ స్థానిక కళాకారుల ప్రతిభకు తగిన గుర్తింపు ఇవ్వాలని కోరారు.

స్థానిక కళాకారులను విస్మరించి ఉత్సవాలు నిర్వహించడం సరికాదని, వారి ఆత్మగౌరవాన్ని కాపాడుతూ దసరా వేడుకల్లో భాగస్వాములను చేయాలని దండు సారయ్య స్పష్టం చేశారు. ఇప్పటికైనా అధికారులు సానుకూలంగా స్పందించి స్థానిక నృత్య కళాకారులకు న్యాయం చేయాలని డిమాండ్ చేశారు.

సూర్య రిపోర్టర్ రాజేష్ ఇల్లందు