పెద్దాపూర్ గిరి ప్రదక్షిణకు సురేష్ ఆత్మారామ్ మహారాజ్ గురూజీ

సూర్య జూలపల్లి

పౌర్ణమి సందర్భంగా శనివారం ఉదయం 6 గంటలకు పెద్దాపూర్ శివారులోని స్వయంభుగా వెలసిన  శ్రీ యోగానంద లక్ష్మీనృసింహస్వామి క్షేత్రంలో నిర్వహించనున్న ఏడో గిరి ప్రదక్షిణకు కొండగట్టు గిరి ప్రదక్షిణ సంకల్పకర్త, చిలుకూరు శివాలయ ప్రధాన అర్చకులు సురేష్ ఆత్మారామ్ మహారాజ్ గురూజీ హాజరుకానున్నారని సూర్య విలేఖరి తాటిపల్లి శ్రీనివాస్ తెలిపారు. ఈ సందర్భంగా గురూజీ భక్తులకు సంకల్ప బోధ చేయడంతో పాటు గిరి ప్రదక్షిణను ప్రారంభించేందుకు జెండా ఊపి అనంతరం స్వామివారిని దర్శించుకోనున్నారని పేర్కొన్నారు.పెద్దాపూర్ శివారులోని శ్రీ యోగానంద లక్ష్మీనృసింహస్వామి క్షేత్రం స్వయంభుగా వెలసిన పుణ్యక్షేత్రంగా భక్తుల్లో ప్రత్యేక విశ్వాసాన్ని కలిగి ఉంది. దక్షిణముఖంగా కొలువైన స్వామివారిని భక్తులు కొంగుబంగారంగా భావిస్తారు. తమ కోర్కెలను స్వామివారికి మొక్కుకుని ముడుపులు కడితే అవి నెరవేరుతాయని భక్తుల విశ్వాసం. వివాహం, సంతానప్రాప్తి, కుటుంబ సౌఖ్యం, ఐశ్వర్యం, అభివృద్ధి వంటి శుభకార్యాల కోసం స్వామివారిని ఆశ్రయించి ముడుపులు కట్టే సంప్రదాయం కొనసాగుతోంది.
కొండగట్టు గిరి ప్రదక్షిణ స్ఫూర్తితో ఏప్రిల్‌ 2న ప్రారంభమైన పెద్దాపూర్ గిరి ప్రదక్షిణ ప్రతి పౌర్ణమికి నిర్వహిస్తున్న గిరి ప్రదక్షణ ఇప్పటికే ఆరు విడతలు పూర్తయ్యాయి. ఆరో గిరి ప్రదక్షిణకు సుమారు మూడు వేల మందికి పైగా భక్తులు హాజరు కావడం ప్రత్యేకత సంతరించుకుంది.
పౌర్ణమి సందర్భంగా నిర్వహించే గిరి ప్రదక్షిణలో భక్తులు స్వామివారి నామస్మరణతో కొండ చుట్టూ ప్రదక్షిణ చేసి అనంతరం స్వామివారిని దర్శించుకోనున్నారు. గిరి ప్రదక్షిణను భక్తి సాధనలో భాగంగా నిర్వహిస్తున్న నిర్వాహకులు, క్షేత్రానికి వచ్చే భక్తులకు అవసరమైన ఏర్పాట్లు చేస్తున్నారు.
పెద్దాపూర్ గిరి ప్రదక్షిణకు హాజరు కావాలని సూర్య జూలపల్లి మండల విలేకరి తాటిపల్లి శ్రీనివాస్ చేసిన విజ్ఞప్తికి గురూజీ సానుకూలంగా స్పందించడంతో ఆయన రాక ఖరారైంది. ప్రతి పౌర్ణమికి కొండగట్టులో గిరి ప్రదక్షిణ నిర్వహిస్తూ ఉదయం 7 గంటలకు సంకల్ప కార్యక్రమం చేపట్టాలనే తన ఆధ్యాత్మిక సంకల్పాన్ని గురూజీ గతంలో వెల్లడించగా పెద్దాపూర్ నుంచి ఉదయం 6 గంటలకు బయలుదేరితే కొండగట్టు గిరి ప్రదక్షిణ ప్రారంభ సమయానికి చేరుకోవచ్చని శ్రీనివాస్ చేసిన విజ్ఞప్తి మేరకు ఆయన అంగీకరించారు.
ఇటీవల విడుదల చేసిన వీడియో సందేశంలో గురూజీ భక్తులు ఏకతాటిపైకి వచ్చి ఆధ్యాత్మిక, ధార్మిక కార్యక్రమాల్లో భాగస్వాములు కావడం సంతోషకరమని పేర్కొన్నారు. భక్తి, ధర్మం, ఆధ్యాత్మిక చైతన్యాన్ని పెంపొందించే కార్యక్రమాలు కొనసాగాలని ఆకాంక్షించారు.
గురూజీ పాల్గొనే ఏడో గిరి ప్రదక్షిణకు ఉమ్మడి జిల్లా పరిధిలోని వివిధ ప్రాంతాల నుంచి భక్తులు కుటుంబ సమేతంగా పాల్గొని గిరి ప్రదక్షిణను విజయవంతం చేయాలని నిర్వాహకులు కోరారు.