అమెరికా యుద్ధ నౌక యుఎస్ఎస్ అబ్రహం లింకన్లో కలకలం: సుదీర్ఘ విధులతో ఎనిమిది మంది నావికుల ఆత్మహత్యాయత్నం
సూర్య అంతర్జాతీయ డెస్క్: పశ్చిమాసియాలో సుదీర్ఘ కాలం పాటు మోహరించిన అమెరికాకు చెందిన భారీ యుద్ధ విమాన వాహక నౌక యుఎస్ఎస్ అబ్రహం లింకన్ క్యారియర్ స్ట్రైక్ గ్రూప్లో పనిచేస్తున్న ఎనిమిది మంది నావికులు తీవ్ర మానసిక ఒత్తిడితో ఆత్మహత్యాయత్నానికి పాల్పడినట్లు అమెరికా నౌకాదళం అధికారికంగా ధ్రువీకరించింది. దాదాపు 280 రోజులకు పైగా నిరంతరాయంగా సముద్రంలో కొనసాగిన ఈ సుదీర్ఘ మిషన్లో నావికులు పడిన మానసిక క్షోభ, క్షీణించిన పని పరిస్థితులపై సర్వత్రా ఆందోళనలు వ్యక్తమవుతున్న వేళ ఈ చేదు వాస్తవం వెలుగులోకి వచ్చింది. డెమొక్రాటిక్ సెనేటర్ కిర్స్టెన్ గిల్లీబ్రాండ్ రాసిన లేఖకు సమాధానంగా యుఎస్ యాక్టింగ్ నేవీ సెక్రటరీ హంగ్ కావో ఈ అధికారిక గణాంకాలను వెల్లడించారు.
నౌకాదళ విభాగం అందించిన వివరాల ప్రకారం, ఈ ఆత్మహత్యాయత్నాలు కేవలం విమాన వాహక నౌకకే పరిమితం కాకుండా మొత్తం స్ట్రైక్ గ్రూప్లోని వివిధ రక్షణ నౌకలు, ఎయిర్వింగ్ సిబ్బందిలోనూ చోటుచేసుకున్నాయి. అయితే అదృష్టవశాత్తూ ఈ ఘటనల్లో ఎవరూ ప్రాణాలు కోల్పోలేదని నేవీ సెక్రటరీ స్పష్టం చేశారు. మార్చి నెలలో ఒక నావికుడు నౌక పైనుంచి సముద్రంలోకి దూకేందుకు ప్రయత్నించగా తోటి సిబ్బంది అడ్డుకున్నారని, ఆగస్టు తొలివారంలో మరో నావికుడు నౌక నుంచి నీటిలో పడిపోగా తక్షణమే రక్షించి అత్యవసర వైద్య చికిత్స అందించామని వివరించారు. నిరంతర యుద్ధ విధులతో నావికుల మానసిక ఆరోగ్యం క్షీణిస్తుందంటూ సిబ్బంది కుటుంబ సభ్యులు చేసిన ఫిర్యాదులను గతంలో ఖండించిన ఉన్నతాధికారులు, ఇప్పుడు స్వయంగా ఈ వివరాలు బహిర్గతం చేయడం గమనార్హం.
మరోవైపు నౌకలో ఆహార కొరత, తాగునీటి వ్యవస్థల్లో లోపాలు మరియు సుదీర్ఘ పనిగంటల కారణంగా సిబ్బంది నైతిక స్థైర్యం పూర్తిగా అడుగంటిందని సెనేటర్ గిల్లీబ్రాండ్ తీవ్ర స్థాయిలో విమర్శించారు. తొలుత ఈ ఆరోపణలను ఫేక్ న్యూస్గా కొట్టిపారేసిన డొనాల్డ్ ట్రంప్ యంత్రాంగం, సైనికుల సంక్షేమాన్ని గాలికొదిలేసిందని ఆమె మండిపడ్డారు. ప్రస్తుతం ఈ స్ట్రైక్ గ్రూప్ స్థానంలో మరొక నౌకను మోహరించి, విధులను ముగించుకున్న యుఎస్ఎస్ అబ్రహం లింకన్ను తిరిగి స్వదేశానికి రప్పిస్తున్నారు. సైనిక బలగాల్లో పెరుగుతున్న ఆత్మహత్యల ధోరణిని అరికట్టేందుకు యుద్ధ నౌకల్లో మానసిక నిపుణులు, కౌన్సిలర్లను నియమిస్తున్నట్లు అధికారులు పేర్కొన్నారు.
