మౌన దీక్షలో ఆరోగ్య ఔట్సోర్సింగ్ ఉద్యోగుల సమ్మె

 సూర్య కామారెడ్డి జిల్లా ప్రతినిధి,కామారెడ్డి జిల్లా వైద్య ఆరోగ్యశాఖలోని జాతీయ ఆరోగ్య విషయంలో కాంట్రాక్ట్ ఔట్సోర్సింగ్ విధానంలో పని చేస్తున్న ఉద్యోగుల నిరవధిక సమ్మె ఆరవ రోజుకు చేరింది. ఎన్ హెచ్ ఎం జేఏసీ ఆధ్వర్యంలో మున్సిపల్ కార్యాలయం ఆవరణలో ఆదివారం ఉద్యోగులు మౌన దీక్ష చేపట్టి నోటికి నల్లని రిబ్బన్ ధరించారు. ప్రభుత్వానికి తమ డిమాండ్లపై విన్నవించామని, ఇక నిర్ణయం తీసుకోవాల్సింది ప్రభుత్వమేనని అందుకనే ఈరోజు తాము మౌనంగా ఉన్నామని నిరసన వ్యక్తం చేశారు. కొన్ని రోజులుగా నిర్వహిస్తున్న తమ శాంతియుత నిరవధిక సమ్మెను ప్రభుత్వం గుర్తించాలని, తమ న్యాయపరమైన డిమాండ్లను పరిష్కరించేందుకు కృషి చేయాలని జేఏసీ నాయకులు కోరారు. సద్దుల బతుకమ్మ పండుగను సైతం లెక్కచేయకుండా మహిళా ఉద్యోగులు నేడు నిరసన కార్యక్రమంలో పాల్గొన్నారు. తమ డిమాండ్లు పరిష్కరిస్తే అదే మాకు పెద్ద పండుగని ఆవేదన వెళ్లగక్కారు. ఈ కార్యక్రమంలో ఎన్ హెచ్ ఎం జేఏసీ జిల్లా అధ్యక్షుడు తాళ్లపల్లి సుమన్, ప్రధాన కార్యదర్శి బట్టు పద్మజ, ఉపాధ్యక్షుడు వెంకటరమణ, జేఏసీ నాయకులు డా.మీనాక్షి, డా.సుధాకర్, డా.రవళి, డా.రాహుల్, డా.రాజశేఖర్, అఖిల్, రంజిత్ తదితరులు పాల్గొన్నారు.