అనుపమ నగర్ కమ్యూనిటీ హాల్లో పట్టభద్రుల ఎమ్మెల్సీ ఓటరు నమోదు కార్యక్రమం
కర్మన్ ఘాట్, మేజర్ న్యూస్ :మహబూబ్‌నగర్ – రంగారెడ్డి – హైదరాబాద్ ఉమ్మడి జిల్లాల పట్టభద్రుల శాసనమండలి (MLC) ఎన్నికల ఓటరు నమోదు ప్రక్రియ వేగవంతంగా కొనసాగుతోంది. ఈ క్రమంలో అనుపమ నగర్ కమిటీ హాల్ వేదికగా పైరాములగూడ డివిజన్ బీజేపీ అధ్యక్షులు ఎరుకల మల్లేష్ గౌడ్ ఆధ్వర్యంలో ఆదివారం ప్రత్యేక పట్టభద్రుల ఎమ్మెల్సీ ఓటరు నమోదు కార్యక్రమాన్ని నిర్వహించారు. కాలనీలోని అర్హులైన గ్రాడ్యుయేట్లు పెద్ద ఎత్తున తరలివచ్చి ఫారం-18 దరఖాస్తులను పూర్తి చేసి తమ పేర్లను నమోదు చేసుకున్నారు.
ఈ సందర్భంగా ఎరుకల మల్లేష్ గౌడ్ మాట్లాడుతూ.. నవంబర్ 2023 నాటికి లేదా అంతకుముందే ఏదైనా గుర్తింపు పొందిన విశ్వవిద్యాలయం నుంచి డిగ్రీ పూర్తి చేసిన అర్హులైన పట్టభద్రులందరూ ఈ అవకాశాన్ని సద్వినియోగం చేసుకోవాలని పిలుపునిచ్చారు. ప్రజాస్వామ్యంలో విద్యావంతులైన పట్టభద్రులు తమ ఓటు హక్కును నమోదు చేసుకోవడం బాధ్యత అని, అర్హులైన ప్రతి ఒక్కరూ తగిన ధ్రువపత్రాలతో ఎమ్మెల్సీ ఓటరుగా నమోదు కావాలని ఆయన కోరారు. గతంలో ఓటరుగా ఉన్నప్పటికీ ప్రస్తుత కొత్త జాబితా కోసం మళ్లీ దరఖాస్తు చేసుకోవడం తప్పనిసరి అని గుర్తుచేశారు.
ఈ కార్యక్రమంలో కాలనీ అధ్యక్షులు శేఖర్ రెడ్డి, డి. అమర్నాథ్ రెడ్డి, గౌని వెంకటేష్ గౌడ్, బూరం ప్రకాష్, కంది శ్రీనివాస్ రెడ్డి, గోవర్ధన్ యాదవ్, సిహెచ్. భాస్కర్, మోహన్ రెడ్డి, లక్ష్మీకాంత్ రెడ్డి, లక్ష్మణరావు, ఉమేష్ యాదవ్ తదితర కాలనీ ప్రముఖులు, బీజేపీ కార్యకర్తలు, స్థానిక పట్టభద్రులు పాల్గొన్నారు.
