ఫ్రెంచ్ ఓపెన్‌లో తంటాలు పడిన పీవీ సింధు.. తొలి రౌండ్‌లోనే కిడాంబి శ్రీకాంత్ అవుట్
సూర్య జాతీయ డెస్క్: పారిస్ వేదికగా జరుగుతున్న ప్రసిద్ధ ఫ్రెంచ్ ఓపెన్ బ్యాడ్మింటన్ టోర్నమెంట్‌లో భారత స్టార్ షట్లర్లు మిశ్రమ ఫలితాలు చవిచూశారు. భారత ఏస్ షట్లర్, రెండు ఒలింపిక్స్ పతకాల విజేత పీవీ సింధు తీవ్రంగా శ్రమించి ముందంజ వేయగా, మాజీ నంబర్ వన్ షట్లర్ కిడాంబి శ్రీకాంత్ మాత్రం తొలి రౌండ్‌లోనే పరాజయం పాలై టోర్నీ నుంచి నిష్క్రమించాడు. బుధవారం రాత్రి జరిగిన రౌండ్‌-32 హోరాహోరీ పోరులో పీవీ సింధు 21-14, 8-21, 23-21 తేడాతో థాయ్‌లాండ్ క్రీడాకారిణి సుపనిడాపై చెమటోడ్చి విజయం సాధించింది. మ్యాచ్ ఆద్యంతం ఉత్కంఠభరితంగా సాగిన ఈ పోరులో చివరి వరకు పట్టుసడలించకుండా ఆడిన సింధు క్వార్టర్ ఫైరెస్ట్ దిశగా అడుగులు వేసింది.
మరోవైపు పురుషుల విభాగంలో పోటీపడిన అనుభవజ్ఞుడైన షట్లర్ కిడాంబి శ్రీకాంత్ నిరాశపరిచాడు. ఆయుష్ శెట్టితో జరిగిన మ్యాచ్‌లో శ్రీకాంత్ 21-19, 16-21, 12-21 తేడాతో ఓటమిని చవిచూసి తొలి రౌండ్‌లోనే ఇంటిముఖం పట్టాడు. మొదటి గేమ్‌లో గెలిచి జోరు మీద కనిపించిన శ్రీకాంత్, ఆ తర్వాత తదుపరి రెండు గేమ్‌లలో ప్రత్యర్థి దూకుడును నిలువరించలేకపోయాడు. అదేవిధంగా మహిళల సింగిల్స్ విభాగంలో బరిలోకి దిగిన మరో భారత యువ షట్లర్ ఉన్నతి హుడా కూడా గుంజీ చేతిలో 18-21, 21-12, 17-21 తేడాతో పరాజయం పాలై టోర్నీ నుంచి వైదొలిగింది.
ఇదిలాఉంటే మరో భారత స్టార్ షట్లర్ లక్ష్యసేన్ తలపడాల్సిన మ్యాచ్‌కు సంబంధించి కీలక పరిణామం చోటుచేసుకుంది. వరల్డ్ నంబర్ 9 ఆటగాడైన కొడాయ్ నరోకాకు లక్ష్యసేన్ వాకోవర్ ఇవ్వాల్సి వచ్చింది. అంతర్జాతీయ టోర్నమెంట్‌లలో కీలక దశకు చేరుకుంటున్న ఈ సమయంలో భారత ఆటగాళ్ల ప్రదర్శనపై బ్యాడ్మింటన్ అభిమానులు ఆసక్తిగా గమనిస్తున్నారు. రాబోయే రౌండ్‌లలో పీవీ సింధు మరింత మెరుగైన ప్రదర్శన కనబరిచి దేశానికి పతకం తెస్తుందని క్రీడా వర్గాలు భావిస్తున్నాయి.
Also Read: టీమిండియాకు బిగ్ షాక్.. జింబాబ్వే వన్డే సిరీస్‌కు రేణుకా సింగ్ దూరం
