పీఎం జ్ఞాపికల వేలం 2026

ప్రత్యేక ఆకర్షణగా మహారాష్ట్ర సంస్కృతి, చారిత్రక ఘనతలు
సూర్య జాతీయ డెస్క్: ప్రధానమంత్రి నరేంద్ర మోదీకి బహుమతులుగా వచ్చిన జ్ఞాపికల (మొమెంటోల) ఈ-వేలం 2026లో మహారాష్ట్ర సంస్కృతి, సాంప్రదాయాలు మరియు చారిత్రక ఘనతలకు ప్రత్యేక ప్రాధాన్యత లభించింది. ఈ వేలంలో మహారాష్ట్ర విశిష్టతను ప్రతిబింబించేలా ఏకంగా 89 రకాల ప్రత్యేక జ్ఞాపికలను అందుబాటులో ఉంచారు. ఈ సేకరణలో ఛత్రపతి శివాజీ మహారాజ్ వీరగాథలు, వార్లీ గిరిజన కళారూపాలు, సంత్ తుకారాం, సంత్ జ్ఞానేశ్వర్ భక్తి సాంప్రదాయాలు, క్రీడాకారుల జ్ఞాపకాలు మరియు రాష్ట్రంలోని ఆధునిక మౌలిక సదుపాయాల నమూనాలు ప్రత్యేక ఆకర్షణగా నిలుస్తున్నాయి.

ఈ వేలంలో ప్రదర్శించిన జ్ఞాపికల్లో ఛత్రపతి శివాజీ మహారాజ్ ఘనచరిత్రకు సంబంధించిన అంశాలు ప్రముఖంగా ఉన్నాయి. ఆయన సింహాసనంపై ఆసీనుడై ఉన్న రూపాలు, గుర్రంపై ఉన్న విగ్రహాలు, రాయిగఢ్ కోటలోని మేఘడంబరి ప్రతిరూపంతో పాటు వెండి విగ్రహాలు కొనుగోలుదారులను విశేషంగా ఆకట్టుకుంటున్నాయి. వీటితో పాటు మహారాష్ట్రకు చెందిన ప్రసిద్ధ వార్లీ కళారూపాలు, గ్రామీణ జీవితం, రైతు సంస్కృతి మరియు గిరిజన నాయకుడు బిర్సా ముండా చిత్రాలతో కూడిన సాంప్రదాయ పెయింటింగ్‌లు కళాభిమానులను అలరిస్తున్నాయి.

కేవలం చారిత్రక అంశాలే కాకుండా, పారిస్ 2024 పారాలింపిక్స్ క్రీడాకారులు సుకాంత్ కదమ్ సంతకం చేసిన బ్యాడ్మింటన్ రాకెట్, సచిన్ ఖిలారీ షాట్‌పుట్ వంటి క్రీడా జ్ఞాపకాలు కూడా ఇందులో ఉన్నాయి. మరోవైపు నవీ ముంబై అంతర్జాతీయ విమానాశ్రయం, వధావన్ పోర్ట్ మరియు థానే-బోరివలి ట్విన్ టన్నెల్ ప్రాజెక్టుల నమూనాలు మహారాష్ట్ర ఆధునిక అభివృద్ధికి అద్దం పడుతున్నాయి. డాక్టర్ బి.ఆర్. అంబేద్కర్, లోకమాన్య తిలక్, అహిల్యాబాయి హోల్కర్ వంటి మహనీయుల విగ్రహాలు కూడా ఈ జాబితాలో చేర్చారు.

8వ ఎడిషన్‌గా జరుగుతున్న పీఎం జ్ఞాపికల ఈ-వేలం 2026 అక్టోబర్ 2 వరకు కొనసాగనుంది. ఈ వేలం ద్వారా వచ్చే ఆదాయాన్ని పవిత్ర గంగా నది ప్రక్షాళన కోసం చేపట్టిన ‘నమామి గంగే’ ప్రాజెక్టుకు విరాళంగా అందించనున్నారు. ఆసక్తి కలిగిన పౌరులు మరియు కళాభిమానులు అధికారిక వెబ్‌సైట్ pmmementos.gov.in ని సందర్శించి ఈ వేలంలో పాల్గొనవచ్చని నిర్వాహకులు వెల్లడించారు.