మండుతున్న యూరప్: ప్రజా నిరసనల వెనుక అసలు కారణాలు ఇవే!
సూర్య అంతర్జాతీయ డెస్క్: ఒకప్పుడు ప్రపంచాన్ని తమ గుప్పిట్లో ఉంచుకుని శాసించిన యూరోపియన్ దేశాలు, ప్రస్తుతం తీవ్రమైన ప్రజా నిరసనలతో అట్టుడుకుతున్నాయి. ఫ్రాన్స్, జర్మనీ, బెల్జియం, పోర్చుగల్, ఇటలీ, గ్రీస్ వంటి ప్రముఖ దేశాల్లో విపరీతంగా పెరిగిపోయిన జీవన వ్యయం, ఆకాశాన్నంటుతున్న ఇళ్ల అద్దెలు, తక్కువ వేతనాలు మరియు విద్యారంగంలో కోతలకు వ్యతిరేకంగా లక్షలాది మంది ప్రజలు పెద్ద ఎత్తున రోడ్డెక్కుతున్నారు. ద్రవ్యోల్బణం విపరీతంగా పెరగడం వల్ల నిత్యవసర వస్తువులు, ఇంధన ధరలు భారంగా మారడంతో సామాన్యుల బతుకులు అస్తవ్యస్తంగా మారాయి.
నిరసనలు తీవ్రరూపం దాల్చడంతో పలు యూరోపియన్ నగరాల్లో ఉద్రిక్త పరిస్థితులు తలెత్తాయి. ముఖ్యంగా ఫ్రాన్స్ వంటి దేశాల్లో నిరసనకారులు చేపట్టిన ఆందోళనలు ఉద్రిక్తతకు దారితీయడంతో, భద్రతా దళాలు రంగంలోకి దిగాల్సి వచ్చింది. ప్రభుత్వ విధానాలు, పెరుగుతున్న నిరుద్యోగం, వలసల ప్రభావంపై ప్రజల్లో గూడుకట్టుకున్న అసంతృప్తి ఈ సంక్షోభానికి ప్రధాన కారణమైంది. సోషల్ మీడియా వేదికగా ఒక దేశంలో జరుగుతున్న ఆందోళనల దృశ్యాలు, నినాదాలు క్షణాల్లో మరో దేశంలోని యువతకు చేరుతుండటంతో ఉద్యమం మరింత వేగంగా విస్తరిస్తోంది.
ఒకప్పుడు అత్యున్నత జీవన ప్రమాణాలకు ప్రసిద్ధిగాంచిన యూరప్ దేశాలు, ఇప్పుడు ఇలా అంతర్గత ఆర్థిక సమస్యలతో సతమతమవుతుండటం అంతర్జాతీయంగా తీవ్ర చర్చనీయాంశమైంది. ఈ నిరసనల వెనుక విదేశీ శక్తుల ప్రమేయం ఉందన్న వాదనలు వినిపిస్తున్నప్పటికీ, వాటికి స్పష్టమైన ఆధారాలు లభించలేదు. ప్రభుత్వాలు అనుసరిస్తున్న ఆర్థిక విధానాలు మారకపోతే ఈ ప్రజాాగ్రహం మరింత ఉద్ధృతమై, రాబోయే రోజుల్లో ఆయా దేశాల రాజకీయ స్థిరత్వానికే పెద్ద ముప్పుగా మారుతుందనే హెచ్చరికలు వినిపిస్తున్నాయి.
