యూరప్‌లో భగ్గుమంటున్న నిరసనలు: పెరుగుతున్న జీవన వ్యయమే అసలు కారణం
సూర్య అంతర్జాతీయ డెస్క్: ఒకప్పుడు ప్రపంచాన్ని శాసించిన యూరోపియన్ దేశాలు ప్రస్తుతం తీవ్రమైన ప్రజా నిరసనలతో అట్టుడుకుతున్నాయి. ఫ్రాన్స్, బెల్జియం, పోర్చుగల్, ఇటలీ వంటి ప్రముఖ దేశాల్లో విపరీతంగా పెరుగుతున్న జీవన వ్యయం, తక్కువ వేతనాలు, ఆకాశాన్నంటుతున్న ఇళ్ల అద్దెలు మరియు దిగజారుతున్న ప్రజా సేవలకు వ్యతిరేకంగా లక్షలాది మంది ప్రజలు రోడ్డెక్కారు. విద్యారంగంలో బడ్జెట్ కోట్లకు వ్యతిరేకంగా విద్యార్థులు ప్రారంభించిన ఆందోళనలు క్రమంగా కార్మిక సంఘాలు, సామాన్య ప్రజలను కలుపుకుంటూ విస్తృత రూపం దాల్చాయి. ద్రవ్యోల్బణం విపరీతంగా పెరగడం వల్ల నిత్యవసర వస్తువులు, ఇంధన ధరలు భారంగా మారడంతో సామాన్యుల జీవితాలు అస్తవ్యస్తంగా మారాయి.
నిరసనలు తీవ్రరూపం దాల్చడంతో పలు ప్రధాన నగరాల్లో ఉద్రిక్త పరిస్థితులు నెలకొన్నాయి. ముఖ్యంగా ఫ్రాన్స్‌లో నిరసనకారులు పెద్ద ఎత్తున కదలిరాగా, కొన్ని ప్రాంతాల్లో నిరసనలు హింసాత్మకంగా మారి ఘర్షణలు చోటుచేసుకున్నాయి. పబ్లిక్ ఆస్తులకు నష్టం వాటిల్లడం, ప్రభుత్వ భవనాలు మరియు వాహనాలపై దాడులు జరగడంతో భద్రతా దళాలు బాష్పవాయువు, వాటర్ క్యానన్లను ప్రయోగించాల్సి వచ్చింది. ఈ అల్లర్ల నేపథ్యంలో వేలాది మందిని పోలీసులు అదుపులోకి తీసుకున్నారు. విద్యార్థులు, ఉపాధ్యాయులు మరియు కార్మికులు చేపట్టిన ఈ ఆందోళనలు ఆయా దేశాల ప్రభుత్వాలకు తీవ్ర రాజకీయ సవాళ్లను విసురుతున్నాయి.
ప్రభుత్వాల ఆర్థిక విధానాలు, వలసల ప్రభావం మరియు నిరుద్యోగం వంటి అంశాలపై ప్రజల్లో పెరుగుతున్న అసంతృప్తి ఈ ఆందోళనలకు ఆజ్యం పోసింది. సోషల్ మీడియా వేదికగా ఒక దేశంలోని నిరసనల ప్రభావం మరో దేశంలోని యువతకు త్వరగా పాకడంతో ఉద్యమం అంతర్జాతీయంగా చర్చనీయాంశమైంది. రాబోయే రోజుల్లో ఈ సంక్షోభం యూరప్ రాజకీయాలపై ఎలాంటి ప్రభావం చూపుతుందనే దానిపై తీవ్ర ఉత్కంఠ నెలకొంది.
