ఉక్రెయిన్ రాజధాని కీవ్పై రష్యా దాడి
శాంతి చర్చలపై క్లారిటీ ఇచ్చిన ఇరాన్, క్రెమ్లిన్
సూర్య అంతర్జాతీయ డెస్క్: ఉక్రెయిన్ రాజధాని కీవ్పై రష్యా మరోసారి వినాశకరమైన రీతిలో విరుచుకుపడింది. అమెరికా అధ్యక్షుడు డొనాల్డ్ ట్రంప్తో ఉక్రెయిన్ అధ్యక్షుడు వ్లాదిమిర్ జెలెన్స్కీ భేటీ అయిన కొద్ది గంటల్లోనే రష్యా బలగాలు వందలాది అధునాతన డ్రోన్లతో కీవ్పై విరుచుకుపడ్డాయి. బుధవారం ఉదయం నుంచి మధ్యాహ్నం వరకు నాన్స్టాప్గా సాగిన ఈ దాడుల్లో కనీసం ఇద్దరు మృతి చెందగా, 30 మందికి పైగా తీవ్రంగా గాయపడ్డారు. గగనతలంలో అత్యంత వేగంగా ప్రయాణించే జెట్ ఆధారిత డ్రోన్లను రష్యా భారీగా ఉపయోగించడంతో వీటిని అడ్డుకోవడం ఉక్రెయిన్ వాయుసేనకు తీవ్ర సవాలుగా మారింది.
ఈ వినాశకర దాడుల ప్రభావంతో కీవ్ నగరంలో పలుచోట్ల దట్టమైన పొగలు అలుముకున్నాయి. రైల్వే మౌలిక వసతులు, ఇంధన కేంద్రాలు, వాణిజ్య భవనాలు మరియు ఔషధ తయారీ కేంద్రాలే లక్ష్యంగా రష్యా బాంబుల వర్షం కురిపించింది. దాడుల తీవ్రతకు ప్రధాన రైల్వే స్టేషన్ సమీపంలోని వ్యాపార సముదాయాలు, పెట్రోల్ బంకులు దగ్ధమయ్యాయి. ఇదే సమయంలో తూర్పు ఉక్రెయిన్లోని డొనెట్స్క్ రీజియన్లో రష్యా చేసిన వైమానిక దాడిలో మరో నలుగురు పౌరులు ప్రాణాలు కోల్పోగా, పలువురు తీవ్రగాయాలపాలయ్యారు. ఈ దాడులను తీవ్రంగా ఖండించిన జెలెన్స్కీ, రష్యాపై అంతర్జాతీయ ఆంక్షల ఒత్తిడిని మరింత పెంచాలని పిలుపునిచ్చారు.
మరోవైపు అంతర్జాతీయంగా దౌత్యపరమైన చర్చలు ఆశించిన ఫలితాలను ఇవ్వడం లేదు. రష్యాతో శాంతి చర్చలకు ప్రస్తుతానికి ఎలాంటి ప్రాతిపదిక లేదా అనుకూల వాతావరణం లేదని, ఉన్నత స్థాయి సమావేశాలు నిర్వహించే ఆలోచన కూడా లేదని క్రెమ్లిన్ స్పష్టం చేసింది. శక్తి వనరుల వ్యవస్థలపై పరస్పర దాడులను నిలిపివేసేందుకు తాను సిద్ధంగా ఉన్నానని జెలెన్స్కీ ప్రకటించినప్పటికీ, శీతాకాలం నేపథ్యంలో రష్యా దాడులను తట్టుకునేందుకు అమెరికా పేట్రియాట్ వాయు రక్షణ క్షిపణులను అందించాలని ట్రంప్ను కోరారు. అయితే ఈ భేటీలో ఎలాంటి స్పష్టమైన ఒప్పందాలు కుదరలేదు.
ఇదిలా ఉండగా, ఇరాన్ మరియు అమెరికా మధ్య జరుగుతున్న శాంతి చర్చలు కూడా కొలిక్కి రావడం లేదు. ఇరు దేశాల మధ్య అభిప్రాయ భేదాలు ఇంకా తీవ్రంగానే ఉన్నాయని, ఏ క్షణంలోనూ లొంగిపోయే ప్రసక్తే లేదని ఇరాన్ అధ్యక్షుడు మసూద్ పెజెష్కియాన్ స్పష్టం చేశారు. ఒకవైపు రష్యా-ఉక్రెయిన్ మధ్య యుద్ధం తీవ్రరూపం దాల్చడం, మరోవైపు ఇరాన్-అమెరికా మధ్య ఉద్రిక్తతలు సడలకపోవడంతో ప్రపంచవ్యాప్తంగా ఆందోళనకర పరిస్థితులు నెలకొన్నాయి.
