ఐర్లాండ్ పురాణాల ‘నరక ద్వారం’: చారిత్రక గుహ వైపు సరికొత్త నడక మార్గం

సూర్య అంతర్జాతీయ డెస్క్: ఐర్లాండ్ పురాణాల్లో 'నరకానికి ద్వారం' (గేట్ టు హెల్) గా ప్రసిద్ధి చెందిన పురాతన ఓయినాగాట్  గుహను చేరుకునేందుకు పర్యాటకులు, సాహసికుల కోసం సరికొత్త నడక మార్గాన్ని (ట్రయల్) అందుబాటులోకి తీసుకువచ్చారు. కౌంటీ రోస్‌కామన్‌లోని రాత్‌క్రోగన్వద్ద ఉన్న ఈ ప్రదేశం ఐరోపాలోనే అతి పురాతనమైన, తవ్వకాలు జరపని రాజరిక చారిత్రక క్షేత్రాల్లో ఒకటిగా గుర్తింపు పొందింది. దాదాపు 6.5 చదరపు కిలోమీటర్ల విస్తీర్ణంలో విస్తరించి ఉన్న ఈ ప్రాంతంలో ఐరన్ ఏజ్ కోటలు, పురాతన ఐరిష్ లిపితో కూడిన ఓఘమ్ శిలలు, పవిత్ర బావులు సహా 260కి పైగా పురావస్తు అవశేషాలు ఉన్నాయి.

పురాతన సెల్టిక్ పురాణాల ప్రకారం, ఈ ప్రాంతాన్ని అధోలోకానికి లేదా నరకానికి ప్రవేశ ద్వారంగా పరిగణిస్తారు. ముఖ్యంగా నేటి ఆధునిక ‘హాలోవీన్’ పండుగకు మూలమైన ప్రాచీన ఐరిష్ పండుగ 'సౌయిన్' (Samhain) ఆవిర్భావానికి ఈ ఓయినాగాట్ గుహే ప్రధాన స్ఫూర్తి అని చరిత్రకారులు చెబుతారు. ప్రతి సంవత్సరం సౌయిన్ సమయంలో ఈ పాతాళ ద్వారం తెరుచుకుంటుందని, రాక్షసులు, అతీంద్రియ శక్తులు, మార్ఫింగ్ శక్తులు గల దేవతలు బయటకు వచ్చి సంచరిస్తారని స్థానిక నమ్మకం. యుద్ధ దేవత 'మోరిగాన్' నివాసంగా కూడా ఈ గుహకు విశేష గుర్తింపు ఉంది.

ఇంతటి పురాణ ప్రాధాన్యత కలిగిన ఈ క్షేత్రానికి పర్యాటకుల రాకను సులభతరం చేసేందుకు, చారిత్రక కట్టడాలకు ఎలాంటి నష్టం కలగకుండా పర్యావరణహితంగా నూతన ట్రయల్‌ను సిద్ధం చేశారు. ఒకప్పుడు పొలాల గట్ల గుండా వెళ్లాల్సిన ప్రయాణాన్ని తప్పించి, సురక్షితమైన మార్గాన్ని అభివృద్ధి చేయడం వల్ల సందర్శకులు పురాతన ఐరిష్ సంస్కృతిని, సంప్రదాయాలను ప్రత్యక్షంగా వీక్షించే అవకాశం లభిస్తోంది. ఐర్లాండ్ వారసత్వ సంపదను ప్రపంచానికి చాటిచెప్పే దిశగా ఈ ప్రాజెక్ట్ పర్యాటక రంగంలో సరికొత్త ఆకర్షణగా మారింది.