టిక్‌టాక్ అల్గారిథమ్‌పై ఈయూ తీవ్ర ఆరోపణలు.. భారీ ఫైన్ హెచ్చరిక

సూర్య ఇంటర్నేషనల్ డెస్క్: ప్రముఖ షార్ట్-వీడియో సోషల్ మీడియా ప్లాట్‌ఫామ్ టిక్‌టాక్ పై యూరోపియన్ యూనియన్  తీవ్రస్థాయిలో విరుచుకుపడింది. టిక్‌టాక్ తన 'ఫర్ యూ'  ఫీడ్‌లో వినియోగదారులను కట్టిపడేసేలా రూపొందించిన రెకమండేషన్ అల్గారిథమ్, ప్రమాదకరమైన ‘రాబిట్ హోల్ ఎఫెక్ట్’కుకారణమవుతోందని ప్రాథమిక విచారణలో తేల్చింది. ఇది బ్లాక్ డిజిటల్ సేవల చట్టం  నిబంధనలను ఉల్లంఘించడమేనని స్పష్టం చేస్తూ, అల్గారిథమ్ డిజైన్‌లో తక్షణ మార్పులు చేయకపోతే భారీ మొత్తంలో జరిమానాలు విధిస్తామని ఈయూ హెచ్చరించింది.

బయటపడలేని ‘రాబిట్ హోల్స్’.. మానసిక ఆరోగ్యంపై తీవ్ర ప్రభావం
యూజర్లు ఒక్కసారి ఒక వీడియోను స్క్రోల్ చేయడం లేదా లైక్ చేయడం ప్రారంభిస్తే, టిక్‌టాక్ అల్గారిథమ్ నిరంతరం అదే తరహా కంటెంట్‌ను స్ట్రీమ్ చేస్తూ వారిని బయటకు రాలేని మాయాజాలంలోకి (రాబిట్ హోల్స్) నెడుతోందని ఈయూ టెక్నాలజీ విభాగం పేర్కొంది. ముఖ్యంగా నిరాశ, ఒంటరితనం, మానసిక క్షోభ, ఈటింగ్ డిజార్డర్స్ మరియు శరీర ఆకృతికి  సంబంధించిన సున్నితమైన కంటెంట్‌ను పదేపదే ప్రదర్శించడం వల్ల మైనర్లు, బలహీన మనస్తత్వం కలిగిన యువత మానసిక ఆరోగ్యం తీవ్రంగా దెబ్బతింటోందని నియంత్రణ సంస్థ తీవ్ర ఆందోళన వ్యక్తం చేసింది.

అల్గారిథమ్ డిజైన్ మార్చాల్సిందే: ఈయూ ఆదేశాలు
యూజర్లు తమకు ఇష్టమైన లేదా అయిష్టమైన కంటెంట్‌ను నియంత్రించుకునేందుకు స్పష్టమైన ఆప్షన్లు ఇవ్వడంలో టిక్‌టాక్ విఫలమైందని ఈయూ అభిప్రాయపడింది. కేవలం యూజర్ క్లిక్స్, వాచ్ టైమ్ ఆధారంగా కాకుండా, వారి స్పష్టమైన ప్రాధాన్యతలకు ప్రాధాన్యతనిచ్చేలా 'ఫర్ యూ' ఫీడ్ నిర్మాణాన్ని మార్చాలని, నియంత్రణ బటన్లను సులభంగా యాక్సెస్ చేసేలా తీర్చిదిద్దాలని కమిషన్ ఆదేశించింది. నిబంధనలు పాటించడంలో విఫలమైతే, టిక్‌టాక్ మాతృసంస్థ అయిన బైట్‌డాన్స్  గ్లోబల్ వార్షిక టర్నోవర్‌లో గరిష్టంగా 6 శాతం వరకు భారీ జరిమానా ఎదుర్కోవాల్సి ఉంటుందని స్పష్టం చేసింది.

ఆరోపణలను ఖండించిన టిక్‌టాక్
యూరోపియన్ కమిషన్ చేసిన ఆరోపణలను టిక్‌టాక్ యాజమాన్యం తీవ్రంగా తోసిపుచ్చింది. కమిషన్ విడుదల చేసిన ప్రాథమిక నివేదికలో వాస్తవాలు వక్రీకరించబడ్డాయని, తమ ప్లాట్‌ఫామ్ భద్రతా వ్యవస్థలు మరియు వినియోగదారుల రక్షణపై ఆధారపడి పనిచేస్తుందని పేర్కొంది. యూజర్లు తమ ఫీడ్‌ను నియంత్రించుకునేందుకు ఇప్పటికే శక్తివంతమైన టూల్స్ అందుబాటులో ఉంచామని, ఈయూ ఆరోపణలను చట్టపరంగా ఎదుర్కొంటామని సంస్థ ప్రతినిధులు స్పష్టం చేశారు. కాగా, ఇదే తరహా అల్గారిథమ్ దుష్ప్రభావాలపై మెటా (ఇన్‌స్టాగ్రామ్, ఫేస్‌బుక్) ప్లాట్‌ఫామ్‌లపై కూడా ఈయూ సమాంతరంగా విచారణ జరుపుతోంది.