ఐరాస పర్యావరణ లక్ష్యాలకు వెనుకబడిన ప్రపంచ దేశాలు

తాజా పరిశోధనలో ఆందోళనకర నిజాలు
సూర్య అంతర్జాతీయ డెస్క్: భూమిపై నివసించే జీవజాలాన్ని, పర్యావరణ వ్యవస్థలను రక్షించేందుకు ఐక్యరాజ్యసమితి నిర్దేశించిన జీవవైవిధ్య లక్ష్యాలను చేరుకోవడంలో ప్రపంచ దేశాలు తీవ్రంగా వెనుకబడ్డాయని తాజా అధ్యయనం వెల్లడించింది. 2030 నాటికి ప్రపంచంలోని కనీసం 30 శాతం భూభాగాన్ని మరియు సముద్ర ప్రాంతాలను సంరక్షిత ప్రాంతాలుగా మార్చాలని లక్ష్యంగా పెట్టుకున్నప్పటికీ, వర్తమాన చర్యలు ఏమాత్రం సరిపోవడం లేదని పరిశోధకులు స్పష్టం చేశారు. ఐరాస జీవవైవిధ్య సదస్సులో చేసుకున్న చారిత్రాత్మక ఒప్పందాలు అమలుకు నోచుకోకపోవడంతో ప్రకృతి సమతుల్యత దెబ్బతినే ప్రమాదం పొంచి ఉంది.

పరిశోధన నివేదిక ప్రకారం భూభాగాల సంరక్షణలో కొంత పురోగతి కనిపిస్తున్నప్పటికీ, సముద్ర వ్యవస్థల రక్షణలో తీవ్ర నిర్లక్ష్యం వ్యక్తమవుతోంది. ప్రభుత్వం చేసిన వాగ్దానాలన్నీ నెరవేరినప్పటికీ 2030 నాటికి 26 శాతం భూభాగం మాత్రమే సంరక్షణలోకి వస్తుందని, సముద్ర తీర ప్రాంతాల్లో ఇది కేవలం 13 శాతానికే పరిమితమవుతుందని అంచనా వేశారు. ఇక అధికారికంగా సంరక్షిత ప్రాంతాలుగా ప్రకటించిన భూభాగాల్లో కూడా చట్టాల అమలు సరిగ్గా లేకపోవడం వల్ల కాగితాలకే పరిమితమవుతున్నాయని, ప్రత్యక్షంగా క్షేత్రస్థాయిలో ఎలాంటి మార్పూ కనిపించడం లేదని పర్యావరణవేత్తలు విమర్శిస్తున్నారు.

పర్యావరణ సంరక్షణకు అవసరమైన నిధుల కొరత ఈ పురోగతికి ప్రధాన అవరోధంగా మారింది. జీవవైవిధ్యాన్ని కాపాడేందుకు ఏటా దాదాపు 75 బిలియన్ డాలర్ల నుండి 150 బిలియన్ డాలర్ల వరకు నిధుల వ్యత్యాసం ఉనట్లు గణాంకాలు తెలుపుతున్నాయి. ముఖ్యంగా సముద్ర జీవజాల పరిరక్షణకు ఏటా 16 బిలియన్ డాలర్లు అవసరం కాగా, ప్రస్తుతం అందుబాటులో ఉన్నది కేవలం 1.8 బిలియన్ డాలర్లు మాత్రమే కావడం గమనార్హం. దీనివల్ల మహాసముద్రాల్లో మత్స్య సంపద క్షీణించడం, పగడపు దిబ్బలు నాశనం కావడం వంటి తీవ్ర పరిణామాలు చోటుచేసుకుంటున్నాయి.

అభివృద్ధి చెందిన దేశాలు తమ హామీల మేరకు ఆర్థిక సాయాన్ని అందించడంలో జాప్యం చేస్తుండటం వల్ల పేద మరియు అభివృద్ధి చెందుతున్న దేశాలు పర్యావరణ రక్షణ చర్యలు చేపట్టలేకపోతున్నాయి. రాబోయే సదస్సుల్లో పర్యావరణ నిధుల కేటాయింపును పెంచడంతో పాటు, ప్రతి దేశం నిర్దిష్ట కార్యాచరణ ప్రణాళికను వేగవంతం చేయాలని పర్యావరణ నిపుణులు విజ్ఞప్తి చేస్తున్నారు. ప్రకృతి వినాశనాన్ని అరికట్టకపోతే భవిష్యత్తులో తీవ్రమైన ఆహార భద్రత మరియు వాతావరణ సంక్షోభాలను ఎదుర్కోవాల్సి వస్తుందని హెచ్చరిస్తున్నారు.