ఇంద్రకీలాద్రిపై ప్రధాని మోదీ పేరిట ఖడ్గమాల అర్చన - పవన్ కళ్యాణ్ ఆదేశాలతో ప్రత్యేక పూజలు నిర్వహించిన లింగమనేని రమేష్

ఇంద్రకీలాద్రి, మేజర్ న్యూస్ : ప్రధాన మంత్రి నరేంద్ర మోదీ ప్రజా ప్రస్థానం 25 వసంతాలు పూర్తి చేసుకున్న సందర్భంగా ఇంద్రకీలాద్రిపై కనకదుర్గమ్మవారి సన్నిధిలో రాజ్యసభ సభ్యుడు లింగమనేని రమేష్ ఆధ్వర్యంలో బుధవారం ప్రత్యేక పూజలు నిర్వహించారు. ఉప ముఖ్యమంత్రి, జనసేన పార్టీ అధ్యక్షుడు పవన్ కళ్యాణ్ ఆదేశాల మేరకు మోదీకి ఆయురారోగ్యాలు, దేశాన్ని వికసిత్ భారత్ దిశగా నడిపించే శక్తిసామర్థ్యాలు కలగాలని కోరుతూ ఖడ్గమాల అర్చన చేయించారు. ఈ సందర్భంగా లింగమనేని రమేష్ మాట్లాడుతూ మోదీ నాయకత్వంలో దేశం అన్ని రంగాల్లో అభివృద్ధి సాధిస్తోందని, ఆంధ్రప్రదేశ్‌కు కూడా కేంద్రం నుంచి ప్రాధాన్యత లభిస్తోందన్నారు. అమరావతి, పోలవరం, భోగాపురం విమానాశ్రయం వంటి అభివృద్ధి పనులు వేగంగా కొనసాగుతున్నాయని తెలిపారు. భారత్ మరింత బలమైన, సుసంపన్నమైన, ఆత్మనిర్భర దేశంగా అభివృద్ధి చెందాలని, వికసిత్ భారత్ సంకల్పం సాకారం కావాలని ఆకాంక్షించారు. ఖడ్గమాల అర్చన ప్రసాదం, అమ్మవారి చిత్రపటం, శేషవస్త్రాలను ప్రధానమంత్రి కార్యాలయానికి పంపనున్నట్లు తెలిపారు. కార్యక్రమంలో ఏపీఎంఎస్‌ఐడీసీ చైర్మన్ చిల్లపల్లి శ్రీనివాస్, జనసేన నాయకులు అమ్మిశెట్టి వాసు, ఠాకూర్ అజయ్ వర్మ, ఆలయ పాలకమండలి సభ్యులు పాల్గొన్నారు.

✍️ప్రేమ్ రాజ్, విజయవాడ, ఎన్టీఆర్ జిల్లా.