కెనాడా సెంట్రల్ బ్యాంక్ కీలక హెచ్చరిక
సూర్య అంతర్జాతీయ డెస్క్ (ఒట్టావా): అంతర్జాతీయ మార్కెట్లో ముడి చమురు ధరలు అకస్మాత్తుగా విపరీతంగా పెరగడం దేశీయ ఆర్థిక వ్యవస్థపై తీవ్ర ప్రభావం చూపుతుందని బ్యాంక్ ఆఫ్ కెనడా గవర్నర్ టిఫ్ మాక్‌లెం స్పష్టం చేశారు. చమురు ధరల పెరుగుదల కారణంగా కెనడాలో రాబోయే కాలంలో ద్రవ్యోల్బణం ఊహించిన దానికంటే చాలా వేగంగా ఎగబాకే ప్రమాదం ఉందని ఆయన ఆందోళన వ్యక్తం చేశారు. ప్రస్తుత భౌగోళిక రాజకీయ పరిస్థితులు మరియు ఇంధన ధరల అస్థిరత సెంట్రల్ బ్యాంక్ ద్రవ్య విధాన నిర్ణయాలపై తీవ్ర ప్రభావం చూపుతున్నాయని ఆయన పేర్కొన్నారు.
ద్రవ్యోల్బణాన్ని అదుపులోకి తెచ్చేందుకు ఇప్పటివరకు తీసుకున్న చర్యలు కొంత ఊరటనిచ్చినప్పటికీ, తాజా పరిణామాలు కొత్త సవాళ్లను విసురుతున్నాయని మాక్‌లెం అభిప్రాయపడ్డారు. ఇంధన ధరల పెరుగుదల రవాణా వ్యయాలను పెంచడంతో పాటు నిత్యవసర వస్తువుల ధరలపై ప్రత్యక్ష ప్రభావం చూపుతుందని, ఇది సాధారణ ప్రజల కొనుగోలు శక్తిని దెబ్బతీస్తుందని ఆర్థిక నిపుణులు హెచ్చరిస్తున్నారు. మార్కెట్ పరిస్థితులకు అనుగుణంగా వడ్డీ రేట్ల విషయంలో తగిన నిర్ణయాలు తీసుకునేందుకు బ్యాంక్ ఆఫ్ కెనడా సిద్ధంగా ఉందని ఆయన సంకేతాలు ఇచ్చారు.
ఆర్థిక వ్యవస్థలో ధరల స్థిరత్వాన్ని కాపాడేందుకు సెంట్రల్ బ్యాంక్ అన్ని ప్రత్యామ్నాయాలను పరిశీలిస్తోందని గవర్నర్ వెల్లడించారు. గ్లోబల్ మార్కెట్లలో చోటుచేసుకుంటున్న ఈ ఊహించని పరిణామాలు కెనడా ఆర్థిక వృద్ధి మందగించడానికి దారితీసే అవకాశం ఉందనే ఆందోళనలు వ్యక్తమవుతున్నాయి. రాబోయే త్రైమాసికాల్లో ద్రవ్యోల్బణ పోకడలను బట్టి తదుపరి వడ్డీ రేట్ల కోత లేదా పెంపుదలపై నిర్ణయం తీసుకుంటామని బ్యాంక్ స్పష్టం చేసింది.
