వేద సంప్రదాయాల పరిరక్షణే భారతీయ సంస్కృతికి పునాది –- బీజేపీ రాష్ట్ర ఉపాధ్యక్షులు గారపాటి చౌదరి

ఏలూరు, సూర్య న్యూస్ : భారతీయ సంస్కృతి, సనాతన ధర్మ పరంపర, ఆధ్యాత్మిక విలువలను భావితరాలకు అందించడంలో వేద పండితులు, వేద పాఠశాలలు కీలక పాత్ర పోషిస్తున్నాయని బీజేపీ రాష్ట్ర ఉపాధ్యక్షులు గారపాటి సీతారామాంజనేయ చౌదరి అన్నారు. ఏలూరు పవర్‌పేటలోని చదలవాడ వారి వీధిలో ఉన్న పాఠశాల ప్రాంగణంలో శ్రీ కాంచీ కామకోటి పీఠానికి చెందిన హేలాపురీ సంస్కృత వేదస్మార్త ప్రయోగ పాఠశాల ఆధ్వర్యంలో నిర్వహిస్తున్న శ్రీదేవి శరన్నవరాత్రి మహోత్సవాల్లో ఆయన పాల్గొని అమ్మవారిని దర్శించుకుని ప్రత్యేక పూజలు నిర్వహించారు. అనంతరం ఉత్సవాల్లో భాగంగా ఏర్పాటు చేసిన వేద పండిత సభలో పాల్గొని వేద పండితులను అభినందించారు

ఈ సందర్భంగా గారపాటి సీతారామాంజనేయ చౌదరి మాట్లాడుతూ వేదాలు భారతీయ జీవన విధానానికి, ఆధ్యాత్మిక చింతనకు మార్గదర్శకాలని, వాటిలో నిక్షిప్తమైన జ్ఞానం సమాజానికి ఎప్పటికీ దిశానిర్దేశం చేస్తుందని పేర్కొన్నారు. వేద సంప్రదాయాలు కేవలం ఆచారాలకే పరిమితం కాకుండా, మానవతా విలువలు, క్రమశిక్షణ, ధర్మబద్ధమైన జీవన విధానానికి పునాదిగా నిలుస్తాయన్నారు.వేద విద్యను అభ్యసిస్తున్న విద్యార్థులను ప్రోత్సహించడంతో పాటు, వేద పాఠశాలలకు సమాజం అండగా నిలవాలని సూచించారు.శ్రీదేవి శరన్నవరాత్రి మహోత్సవాలు భక్తిభావాన్ని పెంపొందించడంతో పాటు, భారతీయ ఆధ్యాత్మిక వారసత్వాన్ని గుర్తుచేస్తాయని అన్నారు. ఇలాంటి ధార్మిక కార్యక్రమాలు సమాజంలో ఆధ్యాత్మిక చైతన్యాన్ని, సాంస్కృతిక ఐక్యతను మరింత బలోపేతం చేస్తాయని గారపాటి చౌదరి తెలిపారు.ఈ కార్యక్రమంలో వేద పాఠశాల అధ్యక్షులు బి.కె.ఎస్.ఆర్. అయ్యంగార్, కార్యదర్శి సీతంరాజు చక్రధర్, జనసేన నాయకులు నారా శేషు, వేద పండితులు, నిర్వాహకులు, భక్తులు తదితరులు పాల్గొన్నారు.

 పసుమర్తి రాము జిల్లా ఇంచార్జ్, ఏలూరు,