సమగ్ర శిక్ష పార్ట్ టైం టీచర్లను రెగ్యులరైజ్ చేయాలి

సమగ్ర శిక్షలో పనిచేస్తున్న ఆర్ట్, క్రాఫ్ట్, హెల్త్ అండ్ ఫిజికల్ ఎడ్యుకేషన్ పార్ట్ టైం ఇన్ స్ట్రక్టర్ల సమస్యలను వెంటనే పరిష్కరించాలని ఏఐటీయూసీ డిమాండ్ చేసింది. ఈ మేరకు గురువారం జిల్లా కలెక్టరేట్ వద్ద జరిగిన ధర్నాకు ఏఐటీయూసీ మద్దతు తెలిపింది. ఈ సందర్భంగా ఏఐటీయూసీ జిల్లా అధ్యక్షులు చంద్రశేఖర్ రెడ్డి మాట్లాడుతూ 14 ఏళ్లుగా సేవలందిస్తున్నా ఉద్యోగ భద్రత లేకపోవడం దారుణమన్నారు. కలెక్టరేట్ వద్ద నిరసన అనంతరం డీఆర్వో నరసింహులుకు వినతిపత్రం అందజేశారు. ఈ సందర్భంగా ఆయన మాట్లాడుతూ పార్ట్ టైం ఇన్ స్ట్రక్టర్లను విద్యాశాఖలో విలీనం చేసి సర్వీసులను క్రమబద్ధీకరించాలని, ఎస్జీటీ స్కేల్ ప్రకారం రూ. 32,670 వేతనం చెల్లించాలని, హెచ్ఆర్ పాలసీ అమలు చేయాలని కోరారు.డిప్యూటేషన్ విధానాన్ని రద్దు చేయాలని, పదవీ విరమణ వయస్సు 62 ఏళ్లకు పెంచి రిటైర్మెంట్ బెనిఫిట్స్, హెల్త్ కార్డు, ఈపీఎఫ్, ఈఎస్ఐ కల్పించాలని, మరణ పరిహారాన్ని రూ. 5 లక్షలకు, ప్రమాద మరణ పరిహారాన్ని రూ. 10 లక్షలకు పెంచాలని, ప్రతి నెల 1వ తేదీన జీతాలు చెల్లించాలని డిమాండ్ చేశారు. ఈ కార్యక్రమంలో యూనియన్ నాయకులు శాంతి, సుధాకర్, మాధవి, సాదిక్, రవి, నవీన్, రాజేష్ పాల్గొన్నారు.