పేద విద్యార్ధి ఉన్నత చదువులకు ఆర్థిక చేయుత.

కళ్యాణదుర్గం టౌన్ ప్రతినిధి :-

ఆర్థిక ఇబ్బందులతో ఉన్నత విద్యను కొనసాగించలేని పేద విద్యార్థికి ఆరా ఇగ్నైట్స్ చారిటబుల్ ట్రస్ట్ అండగా నిలిచింది. కళ్యాణదుర్గం మండలం కాపర్లపల్లి గ్రామానికి చెందిన నిరుపేద విద్యార్థి డిగ్రీ విద్యను పూర్తి చేసి ఉన్నత చదువులు అభ్యసించాలనే లక్ష్యంతో ఉన్నాడు. అయితే అతడి తల్లిదండ్రులు వ్యవసాయ కూలీలుగా పనిచేస్తుండటంతో కుటుంబ పోషణకే ఇబ్బందులు ఎదురవుతున్నాయి. ఉన్నత విద్యకు అవసరమైన ఖర్చులను భరించే స్థోమత లేకపోవడంతో విద్యార్థి చదువు కొనసాగింపుపై ఆందోళన చెందుతున్నాడు. ఈ విషయం ఆరా ఇగ్నైట్స్ చారిటబుల్ ట్రస్ట్ సభ్యుల దృష్టికి రావడంతో వారు విద్యార్థి కుటుంబ పరిస్థితిని తెలుసుకుని, ఆర్థిక ఇబ్బందులను పరిశీలించారు. విద్యార్థి చదువుపై ఉన్న ఆసక్తిని గుర్తించిన ట్రస్ట్ సభ్యులు ఉన్నత విద్యను కొనసాగించేందుకు తమ వంతు సహకారం అందించాలని నిర్ణయించారు. ఇందులో భాగంగా ట్రస్ట్ తరఫున విద్యార్థికి రూ.20 వేల ఆర్థిక సాయాన్ని అందించారు. విద్యాభ్యాసం పూర్తయ్యే వరకు అవసరమైన సహాయ సహకారాలు అందిస్తామని, ఉన్నత చదువుల విషయంలో ఆందోళన చెందాల్సిన అవసరం లేదని విద్యార్థికి భరోసా కల్పించారు. తమ కుటుంబ ఆర్థిక పరిస్థితులను అర్థం చేసుకుని చదువు కొనసాగించేందుకు చేయూత అందించిన ట్రస్ట్ సభ్యులకు విద్యార్థి, కుటుంబ సభ్యులు కృతజ్ఞతలు తెలిపారు. పేద విద్యార్థుల ప్రతిభకు ఆర్థిక పరిస్థితులు అడ్డంకిగా మారకూడదనే ఉద్దేశంతో ట్రస్ట్ సేవా కార్యక్రమాలను నిర్వహిస్తున్నట్లు నిర్వాహకులు తెలిపారు. ప్రతిభ ఉన్నప్పటికీ ఆర్థిక సమస్యల కారణంగా చదువును మధ్యలోనే నిలిపివేయాల్సిన పరిస్థితి రాకుండా తమ వంతు సహకారం అందిస్తామని పేర్కొన్నారు. విద్యార్థులకు విద్యా సహాయం, ఆర్థిక తోడ్పాటు అందించడంతో పాటు సమాజంలో అవసరమైన వారికి అండగా నిలిచే కార్యక్రమాలను నిరంతరం కొనసాగిస్తామని ట్రస్ట్ ప్రతినిధులు తెలిపారు. ఈ సందర్భంగా గ్రామస్తులు ట్రస్ట్ సేవలను అభినందించారు.