గిరిజనుల సాగుభూములకు హక్కులు కల్పించాలి

జంగారెడ్డిగూడెం-మేజర్ న్యూస్  పో లవరం మండలం జిల్లెల్లగూడెం పంచాయతీలో గిరిజనులు 40 ఏళ్లుగా సాగు చేస్తున్న భూములకు యాజమాన్య హక్కులు కల్పించాలని, జిల్లాలోని అన్ని మండలాలను కరువు మండలాలుగా ప్రకటించాలని, ఉపాధి హామీ పనులను 200 రోజులకు పెంచి కూలి రూ.600 చెల్లించాలని డిమాండ్ చేస్తూ ఏజెన్సీ గిరిజన సంఘం, రైతు కూలీ సంఘం ఆధ్వర్యంలో మంగళవారం జంగారెడ్డిగూడెంలో ప్రదర్శన, ఆర్డీవో కార్యాలయం వద్ద ధర్నా నిర్వహించారు.గంగానమ్మ గుడి నుంచి ఆర్టీసీ బస్టాండ్ మీదుగా ఆర్డీవో కార్యాలయం వరకు ప్రదర్శన నిర్వహించి అనంతరం ధర్నా చేపట్టారు. ఈ సందర్భంగా రైతు కూలీ సంఘం రాష్ట్ర అధ్యక్షురాలు ఎస్. ఝాన్సీ మాట్లాడుతూ గిరిజనుల సాగులో ఉన్న భూములను ఇతరులకు అప్పగించే ప్రయత్నాలను విరమించుకోవాలని డిమాండ్ చేశారు. ప్రగడపల్లి, వింజరం, ఇటుకలకోట రెవెన్యూల్లో గిరిజనుల సాగులో ఉన్న భూములకు కూడా యాజమాన్య హక్కులు కల్పించాలన్నారు.ఏజెన్సీ గిరిజన సంఘం జిల్లా అధ్యక్షుడు కుంజం రామారావు మాట్లాడుతూ పోలవరం ప్రాజెక్టు ముంపు గ్రామాలకు పూర్తిస్థాయి పునరావాసం కల్పించాలని, భూమికి భూమి ఇవ్వాలని, ముంపు గ్రామాలను ప్రత్యేక పంచాయతీలుగా గుర్తించి ఎన్నికలు నిర్వహించాలని కోరారు. ఖరీఫ్‌లో వర్షాభావ పరిస్థితుల కారణంగా వ్యవసాయం దెబ్బతిందని నాయకులు పేర్కొన్నారు. అనంతరం సమస్యలతో కూడిన వినతిపత్రాన్ని అధికారులకు అందజేశారు. ఈ కార్యక్రమంలో ఏజెన్సీ గిరిజన సంఘం నాయకులు తాటి బుల్లబ్బాయి, కే. మోహన్, పట్టెం పరమేశ్వరరావు, దాడి రాముడు, కారం దుర్గ, కొమరం రామారావు, తాతి చిన్ని తదితరులు పాల్గొన్నారు.

 రిపోర్టర్ కెవి రమణ రావు జంగారెడ్డిగూడెం ఏలూరు జిల్లా