ఇరుముడి సినిమా ప్రదర్శన నిలిపివేత

మక్తల్ వెంకటరమణ థియేటర్ వద్ద ధర్నా
మక్తల్: మక్తల్ పట్టణంలోని వెంకటరమణ థియేటర్‌లో 'ఇరుముడి' సినిమా ప్రదర్శనను హఠాత్తుగా నిలిపివేయడంపై భక్తులు, ప్రేక్షకులు తీవ్ర నిరసన వ్యక్తం చేశారు. థియేటర్ యాజమాన్యం తీరును నిరసిస్తూ బుధవారం థియేటర్ ఎదుట ధర్నా చేపట్టారు.

థియేటర్ యాజమాన్యం ముందస్తు సమాచారం లేకుండా 'ఇరుముడి' సినిమాను థియేటర్ నుంచి తీసివేయడం పట్ల ప్రేక్షకులు తీవ్ర ఆగ్రహం వ్యక్తం చేశారు. సినిమాను ప్రదర్శిస్తామని చెప్పి మధ్యలోనే తీసివేయడం సరికాదని, దీనివల్ల భక్తుల భావోద్వేగాలు దెబ్బతిన్నాయని ఆందోళనకారులు పేర్కొన్నారు. వెంటనే 'ఇరుముడి' సినిమా ప్రదర్శనను పునరుద్ధరించాలని, ప్రేక్షకులకు క్షమాపణ చెప్పాలని థియేటర్ ముందు బైఠాయించి నినాదాలు చేశారు. ఈ ఘటనతో థియేటర్ ప్రాంగణంలో కొంతసేపు ఉద్రిక్తత నెలకొంది.