పర్యటనలపై ఉన్న శ్రద్ధ హామీలు నెరవేర్చడం పై ఉంచాలి – వెన్నమనేని శ్రీధర్ రావు

సూర్య తంగళ్ళపల్లి:సీఎం రేవంత్ రెడ్డి పర్యటనలపై ఉన్న శ్రద్ధ హామీలు నెరవేర్చడం పై ఉంచాలని బిజెపి తంగళ్ళపల్లి మండల అధ్యక్షుడు వెన్నమనేని శ్రీధర్ రావు అన్నారు. తంగళ్ళపల్లి మండల కేంద్రంలో బిజెపి నాయకులు బుధవారం మీడియా సమావేశం ఏర్పాటు చేసి మాట్లాడారు.. ఎన్నో హామీలు ఇచ్చి నెరవేర్చకుండా సీఎం రేవంత్ రెడ్డి రాజన్న సిరిసిల్లకు వస్తున్నాడన్నారు. నిరుపేదలు డబుల్ బెడ్ రూమ్, ఇందిరమ్మ ఇండ్లు రాక ఇబ్బంది పడుతున్నారన్నారు. అసెంబ్లీలో సీఎం సిరిసిల్ల జిల్లాలో 8 వేల ఎకరాల కబ్జా జరిగిందని చెప్పాడని ఆ కబ్జా భూమిని రికవరీ చేసి పేదలకు పంచాలన్నారు. గత ప్రభుత్వం 9 సంవత్సరాలు పాలించి సిరిసిల్ల నేతన్న సమస్యలకు శాశ్వత పరిష్కారం చూపలేదని ఈ ప్రభుత్వం కూడా అధికారంలోకి వచ్చి 3 సంవత్సరాలు గడుస్తున్న వారిని పట్టించుకోవడంలేదని దుయ్యబట్టారు. తంగళ్ళపల్లి మండల కేంద్రంలో ఇంజనీరింగ్ కాలేజ్ ఏర్పాటు చేయాలని డిమాండ్ చేశారు. సర్పంచులకు ఇచ్చిన హామీలను నెరవేర్చాలని స్పష్టం చేశారు. పారిశుధ్య కార్మికులకు నెలవారి వేతనం రూ 18 వేలు ఇవ్వాలన్నారు. మిడ్ మానేరును పర్యాటక ప్రాంతంగా తీర్చిదిద్ది మిడ్ మానేరు ప్రతి నిర్వాసిత కుటుంబానికి రూ 5,04000 ఇస్తానన్న హామీ నెరవేర్చాలన్నారు. అలాగే  మిడ్ మానేరు నిర్వాసితులకు ఉపాధి కల్పించాలన్నారు. వెంటనే జెడ్పిటిసి, ఎంపిటిసి ఎన్నికలను జరపాలన్నారు. ఈ కార్యక్రమంలో సర్పంచ్ అంచె శ్రీనివాస్ రెడ్డి, వార్డు సభ్యుడు జిందం సంతోష్, బిజెపి నాయకులు కంకణాల రమేష్, గుర్రం మహేష్ తదితరులు పాల్గొన్నారు.