మందుల నిర్వహణలో నిర్లక్ష్యం వహిస్తే చర్యలు తప్పవు: కలెక్టర్ కె. హరిత
సూర్య జైనూర్, జైనూర్ మండల కేంద్రంలోని కమ్యూనిటీ హెల్త్ సెంటర్ (సీహెచ్సీ)ను జిల్లా కలెక్టర్ కె. హరిత మంగళవారం ఆకస్మికంగా తనిఖీ చేశారు. ముందస్తు సమాచారం లేకుండా ఆసుపత్రికి చేరుకున్న కలెక్టర్ వైద్య సేవల నిర్వహణ, సిబ్బంది హాజరు, మందుల నిల్వలు, ఆసుపత్రి పరిసరాల పరిశుభ్రత తదితర అంశాలను క్షుణ్ణంగా పరిశీలించారు.ఈ సందర్భంగా ఆసుపత్రిలో అందుతున్న వైద్య సేవలపై సంబంధిత వైద్యులు, సిబ్బందిని వివరాలు అడిగి తెలుసుకున్నారు. రోగులకు అందుతున్న సేవలు, వైద్య సిబ్బంది విధుల నిర్వహణ, సమయపాలన తదితర అంశాలపై ఆరా తీశారు. ఆసుపత్రికి వచ్చే ప్రతి రోగికి అవసరమైన వైద్య సేవలు సకాలంలో అందేలా చర్యలు తీసుకోవాలని సూచించారు.అనంతరం ఆసుపత్రిలోని మందుల స్టాక్ను కలెక్టర్ పరిశీలించారు. మందులను సక్రమంగా వినియోగించకుండా స్టాక్లోనే ఉంచి గడువు ముగిసేలా చేసి వృథా చేస్తే సహించేది లేదని హెచ్చరించారు. మందుల వినియోగం, నిల్వల వివరాలను ఎప్పటికప్పుడు నమోదు చేస్తూ, అవసరానికి అనుగుణంగా మందులు అందుబాటులో ఉండేలా పర్యవేక్షించాలని సూచించారు. గడువు ముగిసిన మందులు నిల్వల్లో ఉండకుండా ప్రత్యేక శ్రద్ధ వహించాలని ఆదేశించారు.వైద్య సిబ్బంది విధులకు నిర్ణీత సమయానికి హాజరై బాధ్యతాయుతంగా పనిచేయాలని కలెక్టర్ స్పష్టం చేశారు. ఆసుపత్రికి వచ్చే రోగులతో మర్యాదగా వ్యవహరిస్తూ, వారికి మెరుగైన వైద్య సేవలు అందించాల్సిన బాధ్యత సిబ్బందిపై ఉందన్నారు. రోగులకు ఎలాంటి ఇబ్బందులు తలెత్తకుండా అవసరమైన చర్యలు చేపట్టాలని సూచించారు.అలాగే ఆసుపత్రి ఆవరణలో పరిశుభ్రతకు అధిక ప్రాధాన్యత ఇవ్వాలని, పరిసరాల్లో చెత్తాచెదారం పేరుకుపోకుండా ఎప్పటికప్పుడు శుభ్రం చేయించాలని సంబంధిత అధికారులను ఆదేశించారు. ఆసుపత్రిలో పారిశుధ్య నిర్వహణపై ప్రత్యేక దృష్టి సారించాలని సూచించారు.కలెక్టర్ ఆకస్మిక తనిఖీతో ఆసుపత్రి సిబ్బందిలో అప్రమత్తత నెలకొంది. ఆసుపత్రిలో వైద్య సేవల నాణ్యత, మందుల లభ్యత, పారిశుధ్యం, సిబ్బంది సమయపాలనపై నిరంతరం పర్యవేక్షణ కొనసాగించాలని కలెక్టర్ అధికారులకు సూచించారు.
