ఎల్‌నినో ప్రభావాన్ని సమష్టిగా ఎదుర్కొందాం.. రైతులకు ప్రభుత్వం అండగా ఉంటుంది : స్పీకర్ గడ్డం ప్రసాద్ కుమార్

వికారాబాద్ జిల్లా ప్రతినిధి మేజర్ న్యూస్ :

ప్రకృతి విపత్తుగా భావిస్తున్న ఎల్‌నినో ప్రభావాన్ని ప్రజలందరం కలిసికట్టుగా ఎదుర్కోవాలని తెలంగాణ శాసనసభ స్పీకర్, వికారాబాద్ ఎమ్మెల్యే గడ్డం ప్రసాద్ కుమార్ పిలుపునిచ్చారు. రైతులు ప్రజా ప్రభుత్వం, వ్యవసాయ శాఖ అధికారుల సలహాలు, సూచనలు పాటిస్తూ ముందుకు సాగాలని కోరారు. శుక్రవారం వికారాబాద్ పట్టణంలోని ఎమ్మెల్యే క్యాంపు కార్యాలయంలో మున్సిపల్ చైర్‌పర్సన్ గడ్డం అనన్యతో కలిసి కళ్యాణలక్ష్మి, షాదీ ముబారక్ పథకాల లబ్ధిదారులకు చెక్కులు పంపిణీ చేశారు.ఈ సందర్భంగా స్పీకర్ మాట్లాడుతూ… ఎల్‌నినో ప్రభావాన్ని ఎదుర్కొనేందుకు నీటిని పొదుపుగా వినియోగించుకోవాలని, రైతులకు ప్రభుత్వం అన్ని విధాలుగా అండగా ఉంటుందని భరోసా ఇచ్చారు. ప్రకృతి విపత్తులను ఎదుర్కోవడంలో ప్రజలందరూ సమన్వయంతో వ్యవహరించాలని సూచించారు.పేద కుటుంబాలకు ఆర్థిక భరోసా కల్పించాలనే లక్ష్యంతో రాష్ట్ర ప్రభుత్వం కళ్యాణలక్ష్మి, షాదీ ముబారక్ పథకాల ద్వారా అర్హులైన లబ్ధిదారులకు ఆర్థిక సాయం అందిస్తోందని తెలిపారు. నిరుపేద కుటుంబాల్లో ఆడపిల్లల వివాహాలు ఆర్థిక భారంగా మారకూడదనే ఉద్దేశంతో ప్రభుత్వం ఈ పథకాలను అమలు చేస్తోందన్నారు. ఈ కార్యక్రమంలో మొత్తం 97 మంది లబ్ధిదారులకు రూ.97,11,252 విలువైన చెక్కులను పంపిణీ చేశారు. వీరిలో 58 మంది కళ్యాణలక్ష్మి, 39 మంది షాదీ ముబారక్ లబ్ధిదారులు ఉన్నారు.రాష్ట్ర ఆర్థిక పరిస్థితి అంతంత మాత్రంగా ఉన్నప్పటికీ ప్రభుత్వం సంక్షేమ పథకాలు, అభివృద్ధి కార్యక్రమాలను కొనసాగిస్తోందని స్పీకర్ పేర్కొన్నారు. రానున్న రోజుల్లో ముఖ్యమంత్రి రేవంత్ రెడ్డి ప్రజలకు శుభవార్త అందించనున్నారని, మరో రెండు మూడు పథకాలను అమలు చేసే అవకాశం ఉందని తెలిపారు. వికారాబాద్ నియోజకవర్గంతో పాటు పట్టణం వేగంగా అభివృద్ధి చెందుతోందని పేర్కొంటూ, హైదరాబాద్ ట్యాంక్‌బండ్ తరహాలో వికారాబాద్‌లోని శివసాగర్ చెరువును సుందరీకరిస్తామని హామీ ఇచ్చారు. ప్రజలకు ఏ సమస్య వచ్చినా పరిష్కారానికి కృషి చేస్తానని భరోసా ఇచ్చారు.మున్సిపల్ చైర్‌పర్సన్ గడ్డం అనన్య మాట్లాడుతూ… ప్రజా ప్రభుత్వ హయాంలో వికారాబాద్ పట్టణం అభివృద్ధి దిశగా ముందుకు సాగుతోందని తెలిపారు. పట్టణంలోని అన్ని వార్డుల్లో రోడ్లు, డ్రైనేజీ నిర్మాణ పనులు వేగంగా జరుగుతున్నాయని, మిగిలిన పనులను కూడా త్వరలో పూర్తి చేస్తామని చెప్పారు.ఈ కార్యక్రమంలో మున్సిపల్ చైర్‌పర్సన్ అర్థ సుధాకర్ రెడ్డి, కౌన్సిలర్లు, స్థానిక ప్రజాప్రతినిధులు, కాంగ్రెస్ పార్టీ నాయకులు, కార్యకర్తలు, సంబంధిత అధికారులు, లబ్ధిదారులు పెద్ద సంఖ్యలో పాల్గొన్నారు.