SDRF వీరోచిత రెస్క్యూ.. ముగ్గురి ప్రాణాలు కాపాడిన బలగాలు

ఉత్తరాఖండ్‌లో హూడీ నది ఉప్పెన
చంపావత్ (ఉత్తరాఖండ్): పశువుల మేత కోసం అడవికి వెళ్లి ఉప్పొంగుతున్న నది అవతలి వైపు చిక్కుకుపోయిన ముగ్గురు వ్యక్తులను ఎస్‌డిఆర్‌ఎఫ్ (SDRF) బలగాలు సురక్షితంగా రక్షించాయి. ఉత్తరాఖండ్‌లోని చంపావత్ జిల్లా చినిగోత్ ప్రాంతంలో హూడీ నది ఉద్ధృతంగా ప్రవహిస్తున్న సమయంలో ఈ రెస్క్యూ ఆపరేషన్ జరిగింది. ప్రమాదకరమైన నీటి ప్రవాహాన్ని సైతం లెక్కచేయకుండా SDRF బృందం చూపిన సమయస్ఫూర్తిపై సర్వత్రా ప్రశంసలు వ్యక్తమవుతున్నాయి.

రోజువారీ పనుల్లో భాగంగా ముగ్గురు గ్రామీణులు పశువుల మేత కోసం హూడీ నది దాటి అడవికి వెళ్లారు. అయితే ఎగువ ప్రాంతాల్లో కురిసిన భారీ వర్షాల కారణంగా నదిలో హఠాత్తుగా నీటిమట్టం పెరిగి తీవ్ర రూపం దాల్చింది. దీంతో వారు నది అవతలి గట్టునే చిక్కుకుపోయారు. స్థానికుల ద్వారా సమాచారం అందుకున్న వెంటనే తనక్‌పూర్‌కు చెందిన స్టేట్ డిజాస్టర్ రెస్పాన్స్ ఫోర్స్ (SDRF) బృందం రెస్క్యూ పరికరాలతో ఘటనా స్థలానికి చేరుకుంది.

నదిలో ప్రవాహ వేగం చాలా బలంగా ఉన్నప్పటికీ, SDRF సిబ్బంది రోప్‌లు, రక్షణ కవచాల సహాయంతో సాహసోపేతంగా అవతలి గట్టుకు చేరుకున్నారు. చిక్కుకుపోయిన ముగ్గురినీ సురక్షితంగా ఇవతలి ఒడ్డుకు తీసుకువచ్చారు. సమయానికి స్పందించి తమ ప్రాణాలను కాపాడిన SDRF బృందానికి, అధికారులకు బాధితులు మరియు గ్రామస్తులు ప్రత్యేక ధన్యవాదాలు తెలిపారు.