బరేలీలో అల్లరిమూకలు ఇప్పుడు జైలులోనే ఉర్సు జరుపుకుంటున్నారు: యూపీ సీఎం యోగి ఆదిత్యనాథ్ ఘాటు వ్యాఖ్యలు!

సూర్య జాతీయ డెస్క్: ఉత్తరప్రదేశ్ రాష్ట్రం ఇప్పుడు గొడవలు, అలజడులతో కాకుండా ఉత్సవాలు, అభివృద్ధి, నాణ్యమైన విద్యా వ్యవస్థతో గుర్తింపు పొందుతోందని ముఖ్యమంత్రి యోగి ఆదిత్యనాథ్ స్పష్టం చేశారు. బరేలీలో మంగళవారం జరిగిన కార్యక్రమంలో పాల్గొన్న ఆయన, గత ప్రభుత్వాల తీరుపై తీవ్ర స్థాయిలో విరుచుకుపడ్డారు. 2017కు ముందు రాష్ట్రంలో ఏ పండుగ వచ్చినా బరేలీలో ఖచ్చితంగా అల్లర్లు చెలరేగేవని, అయితే తమ ప్రభుత్వం అధికారంలోకి వచ్చిన తర్వాత గూండాలు, దౌర్జన్యకారుల ఆటలు సాగడం లేదని, నాడు వీధుల్లో అల్లర్లు సృష్టించిన వారంతా ప్రస్తుతం జైలు ఊచల వెనుక కూర్చునే ఉర్సు ఉత్సవాలను జరుపుకుంటున్నారని ఆయన ఎద్దేవా చేశారు.  

ఇప్పుడు ఎవరైనా రాష్ట్రంలో అల్లర్లకు పాల్పడితే వారి పూర్వీకుల ఆస్తులను కూడా కోల్పోవాల్సి వస్తుందని సీఎం హెచ్చరించారు. ఒకప్పుడు ప్రజలు అడుగుపెట్టడానికి భయపడిన సంభాల్ వంటి ప్రాంతాలు నేడు శాంతియుతంగా వర్ధిల్లుతున్నాయని, యూపీ పోలీసుల వాహనాన్ని చూస్తేనే మాఫియా వెన్నులో వణుకు పుడుతోందని పేర్కొన్నారు. స్వతంత్ర భారతంలో పాలకులు విద్యను విస్మరించడం వల్ల రాష్ట్ర ఆర్థిక వ్యవస్థ, శాంతిభద్రతలు దెబ్బతిన్నాయని గుర్తుచేస్తూ, రాష్ట్ర గుర్తింపు దాని విద్యా విధానంపైనే ఆధారపడి ఉంటుందని, నేడు విద్యా రంగానికి అత్యున్నత ప్రాధాన్యతనిస్తూ యూపీని ప్రగతి పథంలో నడిపిస్తున్నామని ఆయన స్పష్టం చేశారు.