అమెరికా అధ్యక్షుడు ట్రంప్ తిరస్కరణ
దౌత్య పరిష్కారమే మార్గమని స్పష్టం చేసిన ఇరాన్
సూర్య అంతర్జాతీయ డెస్క్: అమెరికా, ఇజ్రాయెల్లతో సాగుతున్న సుదీర్ఘ పోరాటానికి మరియు ఉద్రిక్తతలకు దౌత్యపరమైన చర్చల ద్వారానే పరిష్కారం సాధ్యమని ఇరాన్ స్పష్టం చేసింది. హోర్ముజ్ జలసంధిని తిరిగి తెరవడం, ప్రాంతీయ పోరాటాలను ముగించడం లక్ష్యంగా ఇరాన్ ప్రతిపాదించిన శాంతి ప్రణాళికను అమెరికా అధ్యక్షుడు డోనాల్డ్ ట్రంప్ తిరస్కరించిన నేపథ్యంలో ఇరాన్ విదేశాంగ మంత్రి అబ్బాస్ అరాగ్చీ ఈ వ్యాఖ్యలు చేశారు. కతార్ మధ్యవర్తుల ద్వారా ఐక్యరాజ్యసమితి సాధారణ మహాసభ వేదికగా అమెరికాకు పంపిన ప్రతిపాదనలపై స్పందించిన ట్రంప్, యుద్ధంలో తీవ్రంగా నష్టపోతున్న ఇరాన్ నిరాశతోనే ఈ ఒప్పందానికి ముందుకు వచ్చిందని వ్యాఖ్యానించారు.
శాంతి ఒప్పందం కుదిరితే ఏడు రోజుల్లో హోర్ముజ్ జలసంధిని పునఃప్రారంభించడంతో పాటు ప్రాంతీయ పోరాటాలను నిలిపివేసేందుకు సిద్ధంగా ఉన్నామని ఇరాన్ ప్రకటించింది. అయితే తమపై విధించిన ఆర్థిక ఆంక్షలను, నౌకాశ్రయ దిగ్బంధనాన్ని అమెరికా తక్షణమే తొలగించాలని ఇరాన్ షరతు విధించింది. ఈ క్రమంలో వైట్ హౌస్లో విలేకరులతో మాట్లాడిన ట్రంప్, ఇరాన్ ప్రతిపాదించిన షరతులు ఏమాత్రం అంగీకారం కాదంటూ శాంతి ప్రణాళికను బహిరంగంగా తోసిపుచ్చారు. అయితే మధ్యవర్తుల నుండి తమకు అధికారికంగా ఎలాంటి ప్రతికూల సంకేతాలు అందలేదని, దౌత్య మార్గాలు ఇంకా తెరిచే ఉన్నాయని ఇరాన్ విదేశాంగ శాఖ పేర్కొంది.
మరోవైపు అణు కార్యక్రమం విషయంలో ఏమాత్రం వెనక్కి తగ్గేది లేదని ఇరాన్ స్పష్టం చేసింది. యురేనియం రవాణా లేదా శుద్ధి ప్రక్రియలపై విదేశీ ఒత్తిళ్లకు తలొగ్గేది లేదని, శాంతి ఒప్పందం కుదిరినా అణు హక్కులపై ఎటువంటి రాజీ ఉండదని ప్రతినిధులు వెల్లడించారు. ఇరాన్ అధ్యక్షుడు మసూర్ పెజెష్కియాన్ మాట్లాడుతూ, తమ దేశం యుద్ధాన్ని కోరుకోవడం లేదని, అయితే ఎలాంటి ఆధిపత్య ధోరణినైనా, బెదిరింపులనైనా తిప్పికొట్టేందుకు సిద్ధంగా ఉన్నామని హెచ్చరించారు. ఈ యుద్ధం కారణంగా అంతర్జాతీయ చమురు సరఫరా తీవ్రంగా దెబ్బతిని ప్రపంచ ఆర్థిక వ్యవస్థపై ప్రభావం చూపుతుండటంతో గల్ఫ్ దేశాలు కూడా తీవ్ర ఆందోళన వ్యక్తం చేస్తున్నాయి.
ఏడు నెలలుగా కొనసాగుతున్న ఈ సైనిక ఘర్షణలు గల్ఫ్ ప్రాంతంలో భద్రతా సంక్షోభాన్ని మరింత తీవ్రతరం చేశాయి. దౌత్య చర్చల పురోగతిపై తీవ్ర అనిశ్చితి నెలకొనడంతో పాటు, రాబోయే రోజుల్లో మిలిటరీ చర్యలు మరిన్ని పెరిగే అవకాశాలు ఉన్నాయని అంతర్జాతీయ రాజకీయ విశ్లేషకులు భావిస్తున్నారు. ఈ పరిస్థితుల్లో అంతర్జాతీయ సమాజం సైతం రెండు దేశాల మధ్య మధ్యవర్తిత్వం వహించి సంక్షోభాన్ని సమన్వయం చేయాలని కోరుతోంది.
