క్రిస్పర్ తరహా విప్లవాత్మక ఎంజైమ్ వ్యవస్థను కనుగొన్న క్లాడ్ ఏఐ మోడల్: ఆంత్రోపిక్ సంచలన ప్రకటన

సూర్య అంతర్జాతీయ డెస్క్: బయోమెడికల్ మరియు జన్యు పరిశోధన రంగంలో సరికొత్త చరిత్ర లిఖిస్తూ సరికొత్త ఎంజైమ్ వ్యవస్థను తమ ఆర్టిఫిషియల్ ఇంటెలిజెన్స్ మోడల్ 'క్లాడ్' స్వయంగా కనుగొన్నట్లు ప్రముఖ ఏఐ సంస్థ ఆంత్రోపిక్ (Anthropic) అధికారికంగా ప్రకటించింది. బ్యాక్టీరియాను సంక్రమించే వైరస్‌లైన బ్యాక్టీరియోఫేజ్‌ల డీఎన్‌ఏను విశ్లేషించే క్రమంలో ప్రపంచ ప్రఖ్యాత జన్యు సవరణ సాంకేతికత క్రిస్పర్ (CRISPR) లాంటి లక్షణాలు కలిగిన ఈ నూతన పరమాణు యంత్రాంగాన్ని ఏఐ గుర్తించింది. ఏఐ ఏజెంట్లు స్వయంగా జీవశాస్త్ర రంగంలో ఇలాంటి ప్రాథమిక శాస్త్రీయ ఆవిష్కరణను సాధించడం అంతర్జాతీయంగా శాస్త్రవేత్తలను విస్మయానికి గురిచేస్తోంది.
సుమారు 950 క్లాడ్ ఏఐ ఏజెంట్లు దాదాపు 21 గంటల పాటు భారీ డీఎన్‌ఏ డేటాబేస్‌ను శోధించి, 20 కోట్లకు పైగా టోకెన్లను ఉపయోగించి ఈ విశ్లేషణను పూర్తి చేశాయి. రివర్స్ ట్రాన్స్‌క్రిప్టేజ్ (ఆర్టీ) అనే ఎంజైమ్ పక్కనే క్రిస్పర్ తరహా డీఎన్‌ఏ పునరావృత అమరికలు (రిపీట్ అర్రేస్) ఉండటాన్ని క్లాడ్ స్వయంగా గుర్తించింది. మానవ శాస్త్రవేత్తలకు నెలల సమయం పట్టే ఈ సంక్లిష్ట విశ్లేషణను ఏఐ స్వల్ప వ్యవధిలోనే ప్రాథమికంగా గుర్తించి నివేదికను రూపొందించింది. ఈ కొత్త వ్యవస్థను పరిశోధకులు 'అర్రే-అసోసియేటెడ్ రివర్స్ ట్రాన్స్‌క్రిప్టేజ్' (ART)గా వ్యవహరిస్తున్నారు.
ఈ పరిశోధనా ఫలితాలను ప్రఖ్యాత క్రిస్పర్ పితామహుడు, ఎంఐటీ ప్రొఫెసర్ ఫెంగ్ జాంగ్ సమీక్షించి, ఏఐ ఏజెంట్లు జీవశాస్త్ర ఆవిష్కరణలకు ఎలా ఊతమివ్వగలవో చెప్పేందుకు ఇది అద్భుత నిదర్శనమని ప్రశంసించారు. డీఎన్‌ఏ కట్టింగ్, పేస్టింగ్ వంటి ఆధునిక జన్యు చికిత్సలకు, ప్రాణాంతక వ్యాధులకు సరికొత్త ఔషధాల తయారీకి ఈ ఆవిష్కరణ మార్గం సుగమం చేయవచ్చని పరిశోధకులు భావిస్తున్నారు.