కిరణ్ అబ్బవరం 'రియాలిటీ' టైటిల్ గ్లింప్స్ విడుదల.. క్రిస్మస్ కానుకగా థియేటర్లలోకి వస్తున్న వైవిధ్యమైన చిత్రం!

సూర్య ఎంటర్‌టైన్‌మెంట్ డెస్క్: వరుస విజయాలతో దూసుకుపోతున్న యువ హీరో కిరణ్ అబ్బవరం తన కెరీర్‌లో అత్యంత ప్రతిష్టాత్మకంగా తెరకెక్కుతున్న తాజా సినిమాకు సంబంధించి ఒక సరికొత్త అప్‌డేట్‌‌ను ప్రకటించారు. గత చిత్రాల సక్సెస్‌ల జోరుమీదున్న ఆయన, ఈసారి నటనతో పాటు కథ, స్క్రీన్‌ప్లే, దర్శకత్వ బాధ్యతలను కూడా తానే స్వయంగా నిర్వహిస్తూ #KA13 చిత్రాన్ని రూపొందిస్తున్నారు. జాయ్ ఫిల్మ్స్ పతాకంపై సుధాకర్ చాగంటి అత్యంత గ్రాండ్‌గా నిర్మిస్తున్న ఈ చిత్రానికి సురేష్ యెర్రా సహ నిర్మాతగా వ్యవహరిస్తున్నారు. కాగా, తాజాగా ఈ సినిమాకు సంబంధించి మేకర్స్ టైటిల్‌ను అధికారికంగా ప్రకటిస్తూ విడుదల చేసిన 'రియాలిటీ' టైటిల్ గ్లింప్స్ ప్రస్తుతం సినీ వర్గాలలో మరియు సోషల్ మీడియాలో విపరీతంగా ఆకట్టుకుంటోంది.

ఈ చిత్రంలో ఆనందం అనే ఒక బాధ్యతగల మధ్యతరగతి యువకుడి పాత్రలో కిరణ్ అబ్బవరం కనిపించనున్నారు. ఎంతో అంకితభావంతో తన హోటల్‌ను నడుపుతూ, అందరికీ రుచికరమైన ఆహారాన్ని వడ్డించడంలోనే పరమానందం వెతుక్కునే పాత్రలో ఆయన ఒదిగిపోయారు. జీవితంలో తనకు నిజమైన కిక్ లేదా హై ఎప్పుడు వస్తుందో వివరిస్తూ, తన కుటుంబానికి ఉన్న అప్పులన్నీ పూర్తిగా తీర్చిన రోజే తనకు అసలైన హై అని ఆయన చెప్పే సంభాషణలు ప్రతి మధ్యతరగతి కుటుంబానికి ఎంతో దగ్గరగా అనిపిస్తాయి. సాధారణ జీవితంలోని వాస్తవ పరిస్థితులకు అద్దం పట్టేలా ఈ కథ ఉండటంతో సినిమాకు 'రియాలిటీ' అనే టైటిల్ వవర్‌ఫెక్ట్‌గా సెట్ అయిందని చెప్పవచ్చు.

ఫ్యామిలీ ఆడియన్స్ పల్స్‌ను అద్భుతంగా పట్టుకున్న కిరణ్ అబ్బవరం, సహజసిద్ధమైన భావోద్వేగాలతో ఈ సినిమాను తెరకెక్కిస్తున్నట్లు గ్లింప్స్ చూస్తే స్పష్టమవుతోంది. స్నేహితులతో తన ఆనందాన్ని పంచుకునే సన్నివేశాలు, టెర్రస్‌పై కుటుంబ సభ్యులతో కలిసి ఆప్యాయంగా గడిపే మూమెంట్స్ కుటుంబ బంధాల విలువను గుర్తుచేస్తున్నాయి. ఈ చిత్రంలో దేవికా భట్ కథానాయికగా నటిస్తుండగా, శరత్ కుమార్, సాయికుమార్, రోహిణి, అన్నపూర్ణమ్మ, సుదర్శన్ వంటి దిగ్గజ నటులు కీలక పాత్రల్లో నటిస్తున్నారు. విశ్వాస్ డేనియల్ సినిమాటోగ్రఫీ, భీమ్స్ సిసిరోలియో అందించిన మ్యూజిక్, ముఖ్యంగా బ్యాక్‌గ్రౌండ్‌లో వినిపించిన భజ గోవిందం ట్రాక్ ఈ గ్లింప్స్‌కు ప్రాణం పోశాయని అభిమానులు ప్రశంసిస్తున్నారు.

ప్రస్తుతం మచిలీపట్నంలో తుది దశ షూటింగ్ జరుపుకుంటున్న ఈ చిత్రం క్రిస్మస్ కానుకగా డిసెంబర్ 25వ తేదీన ప్రపంచవ్యాప్తంగా థియేటర్లలో గ్రాండ్‌గా విడుదల కానుంది. కుటుంబ విలువలు, రియలిస్టిక్ ఎమోషన్స్ కలగలిపిన ఈ ఫుల్ మీల్ ఫీస్ట్ లాంటి సినిమాతో కిరణ్ అబ్బవరం మరోసారి బాక్సాఫీస్ వద్ద భారీ విజయాన్ని అందుకోవడం ఖాయమని సినీ విశ్లేషకులు ధీమా వ్యక్తం చేస్తున్నారు. త్వరలోనే చిత్ర యూనిట్ మరిన్ని ప్రచార కార్యక్రమాలను వేగవంతం చేయనుంది.