'కిల్లర్' ట్రైలర్ లాంచ్.. పూర్వాజ్ సక్సెస్ సాధించాలి అన్న హరీష్ శంకర్!
సూర్య ఎంటర్‌టైన్‌మెంట్ డెస్క్: వైవిధ్యమైన కథాంశంతో ప్రేక్షకుల ముందుకు వచ్చేందుకు సిద్ధమవుతున్న సైన్స్ ఫిక్షన్ చిత్రం కిల్లర్. పూర్వాజ్ హీరోగా నటించడమే కాకుండా స్వయంగా దర్శకత్వం వహించిన ఈ సినిమా ట్రైలర్ ఆవిష్కరణ కార్యక్రమం హైదరాబాద్‌లో అత్యంత వైభవంగా జరిగింది. ఈ ప్రత్యేక కార్యక్రమానికి స్టార్ డైరెక్టర్ హరీష్ శంకర్ ముఖ్య అతిథిగా హాజరై గ్రాండ్‌గా ట్రైలర్‌ను విడుదల చేశారు. ఈ సందర్భంగా సినిమా యూనిట్‌కు ఆయన తన శుభాకాంక్షలు తెలియజేస్తూ చిత్ర బృందాన్ని అభినందించారు.
ట్రైలర్ విడుదల అనంతరం ప్రముఖ దర్శకుడు హరీష్ శంకర్ మాట్లాడుతూ కిల్లర్ సినిమా బడ్జెట్, కేటాయించిన పని దినాలు మరియు ట్రైలర్ విజువల్స్ చూస్తుంటే చిత్ర యూనిట్ ఎంతో క్వాలిటీతో ఈ సినిమాను రూపొందించారని ప్రశంసించారు. విభిన్నమైన కాన్సెప్ట్‌తో వస్తున్న ఈ సినిమాతో పూర్వాజ్‌కి మంచి గుర్తింపుతో పాటు ఆశించిన విజయం దక్కాలని ఆయన ఆకాంక్షించారు. పరిశ్రమలో సరికొత్త ప్రయోగాలు చేసే ప్రతిభావంతులకు ఎప్పుడూ మంచి ఆదరణ లభిస్తుందని ఆయన ఈ సందర్భంగా పేర్కొన్నారు.
ఈ చిత్రంలో జ్యోతి పూర్వాజ్ కథానాయికగా నటించగా, మనీష్ గిలాడా, చంద్రకాంత్ కొల్లు, అయినాబత్తిన దశరథ మాధవ్ ఇతర ముఖ్య పాత్రల్లో మెరిశారు. ఉర్వీష్ పూర్వాజ్ సమర్పణలో ధ్యానం నాన్నగారు ఆశీస్సులతో పూర్వాజ్, పద్మనాభరెడ్డి .ఎ సంయుక్తంగా ఈ చిత్రాన్ని నిర్మించారు. నిర్మాత పద్మనాభరెడ్డి మాట్లాడుతూ పూర్వాజ్ ప్రతిభను నమ్మి ఈ సినిమాను నిర్మించానని, ఫస్ట్ కాపీ చూశాక చాలా సంతృప్తిగా, సంతోషంగా అనిపించిందని తెలిపారు. సినిమా ఖచ్చితంగా ప్రేక్షకాదరణ పొందుతుందనే ధీమాను ఆయన వ్యక్తం చేశారు.
చిత్ర విశేషాలను కథానాయిక జ్యోతి పూర్వాజ్ పంచుకుంటూ అంతర్జాతీయ స్థాయిలో సైన్స్ ఫిక్షన్ కథాంశంతో, అద్భుతమైన స్క్రీన్ ప్లేతో ఈ చిత్రాన్ని తెరకెక్కించామని చెప్పారు. అలాగే హీరో మరియు దర్శకుడు పూర్వాజ్ మాట్లాడుతూ ఈ సినిమా కథ 2024, 2025 మరియు 2026 సంవత్సరాల కాలమానం నేపథ్యంలో మూడు విభిన్నమైన లేయర్లలో సాగుతుందని వెల్లడించారు. సైన్స్ ఫిక్షన్ థ్రిల్లర్ అంశాలతో తెరకెక్కిన ఈ చిత్రం అన్ని వర్గాల ప్రేక్షకులను అలరిస్తుందని నమ్మకం వెలిబుచ్చారు. అన్ని కార్యక్రమాలు పూర్తి చేసుకున్న ఈ చిత్రం ఈ నెల 30న ప్రపంచవ్యాప్తంగా థియేటర్లలో విడుదల కానుంది.
Also Read: తమిళ లీగల్ థ్రిల్లర్ 'ఎన్న విలై' మూవీ రివ్యూ.. ఆకట్టుకునేలా ఉందా?
