ప్రైవేట్ బ్యాంకులకు ఎర్నింగ్స్ అప్‌గ్రేడ్ బూస్ట్
సూర్య బిజినెస్ డెస్క్: భారత స్టాక్ మార్కెట్లలో ప్రధాన సూచీ అయిన నిఫ్టీ 50తో పోలిస్తే ప్రైవేట్ రంగ బ్యాంకులు తమ రాబడి అంచనాల (ఎర్నింగ్స్ అప్‌గ్రేడ్స్) విషయంలో అత్యుత్తమ పనితీరును కనబరుస్తున్నాయని ప్రముఖ అంతర్జాతీయ బ్రోకరేజ్ సంస్థ హెచ్‌ఎస్‌బీసీ తాజా నివేదికలో వెల్లడించింది. మార్కెట్ విశ్లేషకులు నిఫ్టీ 50 కంపెనీల ఆదాయ అంచనాల్లో కోత విధిస్తున్న సమయంలో, ప్రైవేట్ బ్యాంకింగ్ దిగ్గజాలు మాత్రం లాభాల వృద్ధిలో నిలకడైన జోరును ప్రదర్శిస్తూ మార్కెట్ కంటే ముందంజలో నిలిచాయి. ఈ నేపథ్యంలో ప్రైవేట్ బ్యాంకింగ్ రంగంపై బుల్లిష్ దృక్పథాన్ని కొనసాగిస్తూ ఐసీఐసీఐ బ్యాంక్ , యాక్సిస్ బ్యాంక్ (Axis Bank), కోటక్ మహీంద్రా బ్యాంక్ ( షేర్లకు 'బై' రేటింగ్‌ను హెచ్‌ఎస్‌బీసీ కొనసాగించింది.
గడచిన ఆరు నెలల కాలంలో నిఫ్టీ 50 సూచీకి సంబంధించిన ఏకీకృత ఈపీఎస్ (EPS - షేరుపై ఆర్జన) అంచనాల్లో సుమారు 2.1 శాతం కోత పడగా, దీనికి భిన్నంగా ప్రధాన ప్రైవేట్ బ్యాంకుల ఎఫ్‌వై28 ఈపీఎస్ అంచనాలు 1.4 శాతం మేర అప్‌గ్రేడ్ అయ్యాయని నివేదిక స్పష్టం చేసింది. ప్రత్యేకించి ఐసీఐసీఐ బ్యాంక్, కోటక్ మహీంద్రా బ్యాంకులు ఈ అప్‌గ్రేడ్లలో ముందువరుసలో నిలిచాయి. బలమైన ఆపరేటింగ్ లెవరేజ్, ఆకర్షణీయమైన వ్యాల్యుయేషన్లు ఈ బ్యాంకింగ్ షేర్లకు మార్కెట్లో మరింత రీ-రేటింగ్ లభించేందుకు తోడ్పడుతున్నాయని హెచ్‌ఎస్‌బీసీ విశ్లేషకులు పేర్కొన్నారు.
బ్యాంకుల నికర వడ్డీ మార్జిన్లు , ఆదాయ వృద్ధికి సంబంధించి కీలక ఆర్థిక అంచనాలను కూడా బ్రోకరేజ్ సంస్థ ప్రస్తావించింది. ఆర్‌బీఐ రెపో రేటులో ప్రతి 25 బేసిస్ పాయింట్ల మార్పు బ్యాంకుల నిమ్స్‌ను దాదాపు 10 బేసిస్ పాయింట్లు పెంచడంతో పాటు ఈపీఎస్‌ను 3 నుంచి 5 శాతం వరకు ప్రభావితం చేస్తుందని అంచనా వేసింది. బలమైన బ్యాలెన్స్ షీట్, నియంత్రణలో ఉన్న నిరర్థక ఆస్తులు (NPA) మరియు నిలకడైన రుణ వితరణ వృద్ధి కారణంగా ప్రైవేట్ బ్యాంకింగ్ షేర్లు రాబోయే రోజుల్లో సూచీల కంటే వేగంగా ర్యాలీ చేసేందుకు విస్తృత అవకాశాలు ఉన్నాయని నివేదిక ముగించింది.
