గుజరాత్లో భారత్ తొలి పోర్ట్ బేస్డ్ ఇ-మెథనాల్ ప్లాంట్
రూ. 2,300 కోట్లతో భారీ ప్రాజెక్ట్
సూర్య వాణిజ్య డెస్క్: గ్లోబల్ గ్రీన్ షిప్పింగ్ ఇంధన రంగంలో భారత్ సరికొత్త చరిత్రకు శ్రీకారం చుట్టింది. గుజరాత్లోని కాండ్లాలోని దీన్దయాళ్ పోర్ట్ అథారిటీ (DPA) వేదికగా దేశంలోనే మొట్టమొదటి పోర్ట్ ఆధారిత ఇ-మెథనాల్ (e-Methanol) ఉత్పత్తి ప్లాంట్కు శనివారం శంకుస్థాపన జరిగింది. గుజరాత్ ముఖ్యమంత్రి భూపేంద్ర పటేల్, కేంద్ర నౌకాయాన, జలమార్గాల శాఖ మంత్రి సర్బానంద సోనోవాల్ మరియు అసోం ముఖ్యమంత్రి డాక్టర్ హిమంత బిస్వా శర్మ సంయుక్తంగా ఈ భారీ ప్రాజెక్టుకు పునాది రాయి వేశారు. సుమారు రూ. 2,300 కోట్ల అంచనా వ్యయంతో నిర్మిస్తున్న ఈ కేంద్రం ద్వారా ప్రతిరోజూ 150 టన్నుల ఇ-మెథనాల్ ఉత్పత్తి కానుంది.
ఈ మెగా ప్రాజెక్టును దీన్దయాళ్ పోర్ట్ అథారిటీ మరియు అసోంకు చెందిన అసోం పెట్రో-కెమికల్స్ లిమిటెడ్ (APCL) సంయుక్తంగా 76:24 నిష్పత్తి భాగస్వామ్యంతో రెండు దశల్లో అభివృద్ధి చేస్తున్నాయి. మొదటి దశలో రూ. 1,200 కోట్ల పెట్టుబడితో రోజుకు 50 టన్నుల సామర్థ్యాన్ని జనవరి 2027 నాటికి, రెండవ దశలో రూ. 1,100 కోట్లతో మరో 100 టన్నుల సామర్థ్యాన్ని మార్చి 2027 నాటికి అందుబాటులోకి తేనున్నారు. ఈ ప్లాంట్ ద్వారా సుమారు 3,500 మందికి పైగా ప్రత్యక్ష, పరోక్ష ఉపాధి అవకాశాలు లభిస్తాయని అధికారులు అంచనా వేస్తున్నారు. పునరుత్పాదక విద్యుత్, గ్రీన్ హైడ్రోజన్ మరియు కార్బన్ డై ఆక్సైడ్లను ఉపయోగించి పర్యావరణహిత గ్రీన్ ఇంధనాన్ని ఉత్పత్తి చేయనున్నారు.
ప్రపంచ మార్కెట్లో గ్రీన్ మెథనాల్ ధర టన్నుకు 1,300 డాలర్లుగా ఉంటే, కాండ్లా ప్లాంట్లో కేవలం 750 డాలర్లకే ఉత్పత్తి కానుండటం గమనార్హం. అంతర్జాతీయంగా అత్యంత రద్దీగా ఉండే ఆసియా-యూరప్ వాణిజ్య కారిడార్లో ప్రయాణించే ఓడలకు కాండ్లా నుంచి ఇ-మెథనాల్ ఇంధనాన్ని సరఫరా చేయనున్నారు. 2070 నాటికి నెట్ జీరో ఉద్గారాల లక్ష్యాన్ని చేరుకునేందుకు, భారత్ను గ్లోబల్ గ్రీన్ ఎనర్జీ హబ్గా మార్చేందుకు ఈ ప్రాజెక్ట్ ఎంతో దోహదపడుతుందని కేంద్ర మంత్రి సర్బానంద సోనోవాల్, గుజరాత్ సీఎంగా ఉన్న భూపేంద్ర పటేల్ వ్యాఖ్యానించారు.
ఈ ప్రాజెక్ట్ 'ఏక్ భారత్ శ్రేష్ఠ భారత్' భావనకు నిలువెత్తు నిదర్శనమని అసోం ముఖ్యమంత్రి హిమంత బిస్వా శర్మ కొనియాడారు. ఈశాన్య రాష్ట్రమైన అసోం సాంకేతిక భాగస్వామ్యం, పశ్చిమ తీరంలో ఉన్న గుజరాత్ ఓడరేవు సదుపాయాలు కలిసి దేశంలో సరికొత్త హరిత విప్లవానికి బాటలు వేస్తున్నాయని అన్నారు. రాబోయే ఐదేళ్లలో దేశీయ మర్చంట్ ఫ్లీట్లోకి మరో 100 కొత్త నౌకలను చేర్చడంతో పాటు, 2047 నాటికి ప్రపంచంలోనే అత్యుత్తమ షిప్ ఓనింగ్ దేశాలలో ఒకటిగా భారత్ను నిలిపేందుకు కేంద్ర ప్రభుత్వం వేగంగా అడుగులు వేస్తోంది.
