అవధూత్ సాఠే ట్రేడింగ్ అకాడమీపై సెబీ కొరడా: రూ. 11.5 కోట్ల జరిమానా విధింపు..
సూర్య ఫైనాన్షియల్ & మార్కెట్స్ బ్యూరో, ముంబై: స్టాక్ మార్కెట్లో శిక్షణ పేరిట నిబంధనలకు విరుద్ధంగా వ్యవహరిస్తున్న అవధూత్ సాఠే ట్రేడింగ్ అకాడమీ ప్రైవేట్ లిమిటెడ్ (ASTAPL) మరియు దాని వ్యవస్థాపకుడు అవధూత్ దినకర్ సాఠేలపై మార్కెట్ నియంత్రణ సంస్థ సెబీ (SEBI) తీవ్రస్థాయిలో చర్యలు చేపట్టింది. రిజిస్ట్రేషన్ లేకుండానే ఇన్వెస్ట్‌మెంట్ అడ్వైజరీ, రీసెర్చ్ అనలిస్ట్ కార్యకలాపాలు సాగిస్తూ ప్రజలను తప్పుదోవ పట్టించారని నిర్ధారించిన సెబీ, సంస్థతో పాటు దాని డైరెక్టర్లపై మొత్తం రూ. 11.5 కోట్ల భారీ జరిమానా విధించింది. అంతేకాకుండా, అనధికార సేవల ద్వారా వసూలు చేసిన రూ. 546.17 కోట్లను బాధితులకు తిరిగి చెల్లించాలని (రీఫండ్) సంచలన ఆదేశాలు జారీ చేసింది.
జరిమానాల వివరాలు – మార్కెట్ నిషేధం:
సెబీ జారీ చేసిన తుది ఉత్తర్వుల ప్రకారం.. అకాడమీ (ASTAPL) పై రూ. 6 కోట్లు, వ్యవస్థాపకుడు అవధూత్ సాఠేపై రూ. 4 కోట్లు, మరో డైరెక్టర్ గౌరీ అవధూత్ సాఠేపై రూ. 1.5 కోట్ల మేర జరిమానా విధించారు. దీంతోపాటు అవధూత్ సాఠే మరియు అకాడమీని రెండేళ్ల పాటు, డైరెక్టర్ గౌరీ సాఠేను ఆరు నెలల పాటు క్యాపిటల్ మార్కెట్లలో ఎలాంటి లావాదేవీలు నిర్వహించకుండా సెబీ నిషేధించింది. సంస్థ నుంచి రూ. 67.87 కోట్ల వడ్డీని సెబీ ఇన్వెస్టర్ ప్రొటెక్షన్ అండ్ ఎడ్యుకేషన్ ఫండ్ (IPEF)లో డిపాజిట్ చేయాలని ఆదేశించింది.
ఐదు నెలల్లోగా రూ. 546 కోట్ల రీఫండ్ పూర్తి చేయాలి:
ట్రేడింగ్ కోర్సుల పేరిట సేకరించిన రూ. 546.17 కోట్ల ఫీజులను అర్హులైన ఇన్వెస్టర్లకు 5 నెలల వ్యవధిలోగా రీఫండ్ చేయాలని సెబీ స్పష్టం చేసింది. రీఫండ్ ప్రక్రియపై క్లయింట్లకు అవగాహన కల్పించేందుకు 30 రోజుల్లోగా ప్రముఖ దినపత్రికల్లో ప్రకటనలు ఇవ్వాలని ఆదేశించింది. ఈ మొత్తాన్ని చెల్లించే వరకు వారి బ్యాంకు ఖాతాల నుంచి నగదు ఉపసంహరణలను (డెబిట్ లావాదేవీలు) నిలిపివేస్తూ ఆదేశాలు ఇచ్చింది. గతంలో హెచ్చరికలు జారీ చేసినప్పటికీ తప్పుదోవ పట్టించే ప్రచారాలతో క్లయింట్లను నష్టాల్లోకి నెట్టారని విచారణలో తేలడంతో సెబీ ఈ కఠిన చర్యలు చేపట్టింది.
