వాడపల్లి వెంకన్న ఆలయ అభివృద్ధికి ప్రతిష్టమైన చర్యలు

ఆత్రేయపురం మేజర్ న్యూస్  వాడపల్లి శ్రీ వేంకటేశ్వర స్వామి వారి ఆలయానికి వచ్చే భక్తులకు ఎలాంటి అసౌకర్యాలు కలగకుండా ప్రభుత్వ తరఫున పటిష్టమైన చర్యలు తీసుకుంటున్నట్లు కొత్తపేట ఎమ్మెల్యే బండారు సత్యానందరావు స్పష్టం చేశారు. రానున్న గోదావరి పుష్కరాల ప్రాధాన్యతను దృష్టిలో ఉంచుకుని వాడపల్లిలో నూతన పుష్కర ఘాట్ నిర్మాణానికి జలవనరుల శాఖ ద్వారా రూ. 4.68 కోట్ల నిధులు మంజూరైనట్లు ఆయన అధికారికంగా వెల్లడించారు. భక్తుల రద్దీని క్రమబద్ధీకరించేందుకు, పుణ్యస్నానాలు ఆచరించేందుకు అనువుగా అత్యాధునిక ప్రమాణాలతో ఈ ఘాట్ నిర్మాణం చేపట్టనున్నట్లు తెలిపారు.

నూతన ప్రాజెక్టు రూపకల్పన ప్రకారం ప్రస్తుతం వాడపల్లి పరిసరాల్లో వేర్వేరుగా ఉన్న చిన్న ఘాట్లన్నింటినీ ఏకం చేస్తూ భక్తులందరికీ సౌకర్యంగా ఉండేలా ఒకే భారీ సమగ్ర ఘాట్‌గా అభివృద్ధి చేయనున్నారు. కోనసీమ జిల్లాలోనే అత్యంత ప్రముఖ పుణ్యక్షేత్రంగా పేరొందిన వాడపల్లికి సాధారణ రోజుల్లోనే కాకుండా, పుష్కరాల సమయంలో లక్షలాది మంది భక్తులు పోటెత్తుతారని, వారి భద్రత మరియు సౌకర్యాలకు అత్యున్నత ప్రాధాన్యత ఇస్తున్నామని ఎమ్మెల్యే వివరించారు. స్నాన ఘట్టాల వద్ద పటిష్టమైన రక్షణ ఏర్పాట్లు, తాగునీరు, మహిళలకు బట్టలు మార్చుకునే గదులు మరియు భక్తుల క్యూలైన్ల నిర్వహణకు అన్ని మౌలిక వసతులు కల్పించనున్నట్లు పేర్కొన్నారు.

భక్తుల చిరకాల కోరికను గుర్తించి పుష్కర ఘాట్ నిర్మాణానికి భారీగా నిధులను మంజూరు చేసినందుకు ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ మరియు జలవనరుల శాఖ మంత్రి నిమ్మల రామానాయుడులకు ఎమ్మెల్యే బండారు సత్యానందరావు హృదయపూర్వక కృతజ్ఞతలు తెలియజేశారు. పుష్కరాల నాటికి పనులను వేగవంతంగా, నాణ్యతా ప్రమాణాలతో పూర్తి చేసి భక్తులకు పూర్తిస్థాయిలో అందుబాటులోకి తీసుకువస్తామని ఆయన భరోసా ఇచ్చారు.