ఉండ్రాజవరంలోని బౌద్ధపీఠాన్ని సందర్శించిన ఎమ్మెల్యే ఆరిమిల్లి రాధాకృష్ణ

తణుకు, సూర్య న్యూస్ : శాంతి, అహింస, కరుణ, మానవతా విలువలను ప్రపంచానికి చాటిచెప్పిన గౌతమ బుద్ధుడి బోధనలు నేటి సమాజానికి ఎంతో అవసరమని తణుకు ఎమ్మెల్యే ఆరిమిల్లి రాధాకృష్ణ పేర్కొన్నారు. గురువారం ఉండ్రాజవరంలోని మైత్రి బుద్ధ విహార్ బౌద్ధపీఠాన్ని ఆయన సందర్శించారు. ఈ సందర్భంగా బుద్ధుడి విగ్రహాన్ని దర్శించుకుని ప్రత్యేక ప్రార్థనలు నిర్వహించారు.

బౌద్ధపీఠం వ్యవస్థాపకులు అనాలియో భంతేజీ ఎమ్మెల్యే ఆరిమిల్లి రాధాకృష్ణకు ఘనస్వాగతం పలికారు. అనంతరం బౌద్ధపీఠం ఆవిర్భావ లక్ష్యాలు, ఆధ్యాత్మిక ప్రాధాన్యం, ప్రస్తుతం నిర్వహిస్తున్న కార్యక్రమాలతో పాటు భవిష్యత్తు అభివృద్ధి ప్రణాళికలను ఎమ్మెల్యేకు వివరించారు. ముఖ్యంగా మైత్రి బుద్ధ విహార్‌కు అంతర్జాతీయ స్థాయిలో గుర్తింపు తీసుకురావాలనే సంకల్పంతో చేపడుతున్న ప్రయత్నాలను ఆయన దృష్టికి తీసుకెళ్లారు.

ఈ సందర్భంగా ఎమ్మెల్యే ఆరిమిల్లి రాధాకృష్ణ మాట్లాడుతూ సమాజంలో శాంతియుత సహజీవనం, పరస్పర గౌరవం, సోదరభావం పెంపొందించడంలో బౌద్ధ ధర్మ బోధనలు కీలక పాత్ర పోషిస్తాయని అభిప్రాయపడ్డారు. ఆధ్యాత్మిక చింతనతో పాటు సామాజిక చైతన్యానికి ఇటువంటి కేంద్రాలు దోహదపడతాయని పేర్కొన్నారు. బౌద్ధ తాత్వికతను భావితరాలకు పరిచయం చేస్తూ, మానవతా విలువలను సమాజంలో మరింత బలోపేతం చేసే దిశగా కార్యక్రమాలు నిర్వహించడం అభినందనీయమన్నారు.

మైత్రి బుద్ధ విహార్‌ను కేవలం ఆధ్యాత్మిక కేంద్రంగానే కాకుండా శాంతి, సౌభ్రాతృత్వం, విశ్వమానవాళి సంక్షేమానికి సంబంధించిన సందేశాలను అందించే వేదికగా తీర్చిదిద్దేందుకు నిర్వాహకులు చేస్తున్న కృషిని ఎమ్మెల్యే ప్రత్యేకంగా ప్రశంసించారు. ప్రపంచస్థాయిలో గుర్తింపు సాధించాలనే లక్ష్యంతో ముందుకు సాగుతున్న ఈ బౌద్ధపీఠం భవిష్యత్తులో మరింత అభివృద్ధి చెంది, ఉండ్రాజవరం ప్రాంతానికి ప్రత్యేక గుర్తింపు తీసుకురావాలని ఆకాంక్షించారు.

రిపోర్టర్.అనుకుమార్.తణుకు. .పశ్చిమగోదావరి జిల్లా.