శ్రమజీవులకు గౌరవప్రదమైన వేదికగా ‘శ్రమశక్తి ఉపాధి కేంద్రం’ తణుకులో రోజువారీ కార్మికుల అడ్డాను ప్రారంభించిన ఎమ్మెల్యే ఆరిమిల్లి రాధాకృష్ణ కార్మికుల సంక్షేమం, ఉపాధి అవకాశాలకు ప్రాధాన్యం

తణుకు, సూర్య న్యూస్ : సమాజ నిర్మాణంలో కీలక పాత్ర పోషిస్తున్న శ్రమజీవులకు గౌరవప్రదమైన వాతావరణం కల్పించడంతో పాటు వారి సంక్షేమానికి ప్రాధాన్యత ఇస్తున్నట్లు తణుకు ఎమ్మెల్యే ఆరిమిల్లి రాధాకృష్ణ పేర్కొన్నారు. తణుకు పట్టణంలోని కప్పల వెంకన్న సెంటర్ వద్ద పురపాలక సంఘం ఆధ్వర్యంలో నూతనంగా నిర్మించిన ‘శ్రమశక్తి ఉపాధి కేంద్రం–రోజువారీ కార్మికుల అడ్డా’ను బుధవారం ఆయన ప్రారంభించారు.

ఈ సందర్భంగా ఎమ్మెల్యే రాదాకృష్ణ మాట్లాడుతూ రెక్కాడితే గానీ డొక్కాడని రోజువారీ కూలీల శ్రమకు సముచిత గుర్తింపు దక్కాలని అన్నారు. నిత్యం ఉపాధి కోసం వివిధ ప్రాంతాల నుంచి పట్టణానికి తరలివచ్చే కార్మికులు తమ పనుల కోసం రహదారుల పక్కన వేచి ఉండాల్సిన పరిస్థితులను దృష్టిలో ఉంచుకుని ప్రత్యేక కేంద్రాన్ని ఏర్పాటు చేసినట్లు వివరించారు. కార్మికులు ఒకేచోట అందుబాటులో ఉండటం వల్ల పనులు కల్పించేవారికి కూడా సౌలభ్యం ఏర్పడుతుందన్నారు.

కార్మికుల శ్రమే సమాజ పురోగతికి పునాదని, వారి సంక్షేమం సామాజిక బాధ్యతగా భావించాలని పేర్కొన్నారు. ఉపాధి అవకాశాలతో పాటు కార్మికుల ఆత్మగౌరవాన్ని కాపాడే విధంగా సౌకర్యాలు కల్పించడం అవసరమన్నారు. శ్రమశక్తి ఉపాధి కేంద్రం రోజువారీ కార్మికులకు ఉపయోగకరమైన వేదికగా నిలుస్తుందని ఆశాభావం వ్యక్తం చేశారు.ఈ కార్యక్రమంలో కూటమి నాయకులు, మున్సిపల్ అధికారులు, రోజువారీ కార్మికులు తదితరులు పాల్గొన్నారు.

రిపోర్టర్.:.అనుకుమార్ ..పశ్చిమగోదావరి జిల్లా.