రాష్ట్ర స్థాయి కబడ్డీ పోటీలకు గోగినేనిపాలెం హైస్కూల్ బాలికలు

ఘంటసాల మేజర్ న్యూస్ :-

కృష్ణాజిల్లా కబడ్డీ అసోసియేషన్ ఆధ్వర్యంలో నిర్వహించిన జిల్లా స్థాయి కబడ్డీ సెలక్షన్స్‌లో గోగినేనిపాలెం శ్రీ ఎన్.జి.రంగా జిల్లా పరిషత్ హైస్కూల్‌కు చెందిన ముగ్గురు బాలికలు జిల్లా జట్టుకు ఎంపికయ్యారు. దీంతో పాఠశాలలో సోమవారం అభినందన సభ నిర్వహించారు.

పమిడిముక్కల మండలం తాడంకి హైస్కూల్‌లో నిర్వహించిన 52వ జిల్లా స్థాయి జూనియర్స్ బాలబాలికల కబడ్డీ సెలక్షన్స్‌లో 9వ తరగతి విద్యార్థిని పెనుమత్స యామినీకుమారి బాలికల జిల్లా జట్టుకు ఎంపికైంది.

అదేవిధంగా పమిడిముక్కల మండలం అగ్నిపర్రు జిల్లా పరిషత్ హైస్కూల్‌లో నిర్వహించిన 36వ జిల్లా స్థాయి సబ్‌జూనియర్స్ బాలబాలికల కబడ్డీ సెలక్షన్స్‌లో 10వ తరగతి విద్యార్థిని లోకం లహరి జిల్లా జట్టుకు ఎంపిక కాగా, 9వ తరగతి విద్యార్థిని గారపాటి జాహ్నవి స్టాండ్‌బైగా ఎంపికైంది.

జిల్లా జట్టుకు ఎంపికైన విద్యార్థినులు లోకం లహరి, పెనుమత్స యామినీకుమారి, స్టాండ్‌బైగా ఎంపికైన గారపాటి జాహ్నవి, వారికి శిక్షణ అందించిన పాఠశాల ఫిజికల్ డైరెక్టర్ అప్పికట్ల రామారావులను పాఠశాల ప్రధానోపాధ్యాయిని లంకే కృష్ణకుమారి, ఎస్‌ఎంసీ చైర్మన్ కుంపటి శ్రీలక్ష్మి, ఉపాధ్యాయ కార్యదర్శి మురాల పిచ్చేశ్వరరావు, పాఠశాల అభివృద్ధి కమిటీ సభ్యులు అత్తులూరి గోపీచంద్, మల్లంపాటి పిచ్చేశ్వరరావు, గుత్తికొండ సుభాష్ చంద్రబోస్, ఉపాధ్యాయులు, విద్యార్థులు, గ్రామ పెద్దలు అభినందించారు.

ఈ సందర్భంగా ఫిజికల్ డైరెక్టర్ అప్పికట్ల రామారావు మాట్లాడుతూ, 36వ సబ్‌జూనియర్స్ బాలబాలికల రాష్ట్ర స్థాయి కబడ్డీ పోటీలు ఈ నెల 10, 11, 12 తేదీల్లో ఏలూరు జిల్లా నూజివీడులో జరుగుతాయని తెలిపారు. అలాగే 52వ జూనియర్స్ బాలబాలికల రాష్ట్ర స్థాయి కబడ్డీ పోటీలు ఈ నెల 16, 17, 18 తేదీల్లో మార్కాపురంలో నిర్వహించనున్నట్లు వెల్లడించారు.

గోగినేనిపాలెం పాఠశాల విద్యార్థినులు రాష్ట్ర స్థాయి పోటీలకు ఎంపిక కావడం పట్ల గ్రామస్థులు, తల్లిదండ్రులు హర్షం వ్యక్తం చేశారు.